"Fazil Mustafaya qarşı təşkil edilən sui-qəsd ölkəmizdə siyasi sabitliyi pozmağa cəhd edənlərin mövcudluğundan xəbər verir" - DEPUTAT

"Dünən həmkarım Fazil Mustafanın sui-qəsdə məruz qalması ölkə daxilində siyasi sabitliyi pozmağa cəhd edənlərin mövcudluğundan xəbər verir".

Bunu Sonxeber.az-a danışan deputat Müşfiq Cəfərov bildirib.

Deputat qeyd edib ki, bu terror aktının arxasında dayananlar bilməlidir ki, Azərbaycan dövləti buna heç cür imkan verməyəcəkdir:

"Bu hadisə aidiyyatı qurumlar tərəfindən ətraflı araşdırılacaq və günahkarlar öz cəzasını çəkəcəkdir. Fazil Mustafanın güllələnməsi paytaxtda son bir aya yaxın müddətdə odlu silah vasitəsilə törədilən dördüncü hadisədir. Düşünürəm ki, bütün bunlar qəsdlə, əvvəlcədən planlanmış, bir-birinə isə cəncirvari bağlığı olan hadisələrdir. Burada bir hədəf var ki, ölkə daxilindəki stabil vəziyyəti pozaraq, Azərbaycan hökumətinin diqqətini Qarabağdan yayındırmaq, daxildəki qarışıqlığa yönəltməkdir. Xüsusilə, Azərbaycanın 44 günlük müharibədəki zəfəri, bölgədə yeni reallıq yaratması, müstəqil siyasət yeridərək heç bir regional və beynəlxalq təzyiqlərə məhəl qoymaması ətrafımızda yeni düşmənlərin peyda olmasına səbəb oldu.

Mən deyərdim ki, təhlükəsizlik məsələsi indi əvvəlki illərdən daha da aktuala çevrilib. Hər birimizin borcu odur ki, Azərbaycanın suverenliyinin möhkəmlənməsi, ölkəmizə qarşı təxribatların qarşısının alınması, vətəndaş hüquqlarının qorunması uğrunda çalışaq. Hər kəsin üzərinə çox böyük vəzifələr düşür. Azərbaycanın suverenliyi, müstəqilliyi və daxildəki sabitlik olduqca zəruridir".

Aysel Yusifqızı

Telegramda izləyin