İsrail hərbçiləri 6 fələstinlini yaralayıb

İsrail hərbçilərinin işğal altındakı İordan çayının qərb sahilində keçirdiyi reydlər zamanı 6 fələstinli yaralanıb, 9 nəfər saxlanılıb.
Sonxeber.az Fələstinin səsi radiosuna istinadən xəbər verir ki, İsrail əsgərləri Fələstinin Azadlıq Xalq Cəbhəsinə (AXC) mənsub fəalları saxlamaq üçün Beytlehem şəhərindəki Dehişa Qaçqınlar Düşərgəsinə basqın edib.

Bu arada İsrail qüvvələri ilə fələstinlilər arasında baş verən insidentlər zamanı biri sinəsindən ağır olmaqla 3 fələstinli gənc yaralanıb. Yaralılar Beyt Cala Dövlət Xəstəxanasına çatdırılıb.

Şahidlər fələstinli gənclərin basqın edən İsrail əsgərlərinin maşınlarına daş ataraq cavab verdiyini, İsrail əsgərlərinin isə gözyaşardıcı qaz, real və rezin güllələrlə cavab verdiyini qeyd edib. Yerli mənbələr hadisələr zamanı 7 fələstinlinin nəzarətə alındığını bildirib.

İsrail rəsmilərindən heç bir cavab gəlməyib.

Fələstinin rəsmi xəbər agentliyi WAFA-nın xəbərində İsrail əsgərlərinin Ramallahın qərbindəki Kefr Nime qəsəbəsinə basqın edərək 3 fələstinlinin yaralandığı bildirilib.

Xəbərdə Ramallahın qərbindəki Beyt Likya qəsəbəsində 2 fələstinlinin nəzarətə alındığı bildirilib.

İsrail hakimiyyəti hələlik həbslər və basqınlarla bağlı açıqlama verməyib.

İşğal altındakı İordan çayının qərb sahili və Şərqi Qüdsdə evlərə tez-tez basqın edən İsrail qüvvələri müxtəlif iddialarla fələstinliləri nəzarətə götürür.

Telegramda izləyin