KİV: "MKİ-də seksual zorakılıq iddiaları ilə bağlı araşdırma aparılır"

ABŞ Konqresinin Nümayəndələr Palatasının Kəşfiyyat Komitəsi Mərkəzi Kəşfiyyat İdarəsi (MKİ) tərəfindən kəşfiyyat xidmətinin sıralarında qısnama və cinsi zorakılıq xəbərlərinə reaksiya prosedurunun mümkün pozulmasını araşdırır.

Bu barədə "Politico" qəzeti yazıb.

Nəşrin yazdığına görə, yanvar ayından bəri MKİ-nin azı üç qadın işçisi komitəyə müraciət edərək qurumun qadın işçilərini qısnama şikayətləri vermək fikrindən daşındırdığını iddia edib. İstintaq MKİ əməkdaşının yanvar ayında həmkarının onu "fiziki zorakılığa" məruz qoyduğunu və dəfələrlə zorla öpməyə çalışdığını iddia edərək komitəyə müraciət etdikdən sonra başlayıb. Qadın yerli hüquq-mühafizə orqanlarına şikayət edib, olay barədə MKİ-nin bir neçə şöbəsinə bildirib, lakin heç nə edilməyib.

Qurumun əməkdaşının sözlərinə görə, Mərkəzi Kəşfiyyat İdarəsinin təhlükəsizlik xidmətinin nümayəndələri ona bildiriblər ki, baş verənlər barədə məlumat versə, bu onun idarədəki karyerasına son qoya bilər. MKİ əməkdaşının vəkili Kevin Kerroll nəşrə deyib ki, idarə Konqresə müraciət etmək istəyən qadınları fəsadlarla hədələyib. Bununla belə, MKİ-nin sözçüsü qəzetə açıqlayıb ki, qurumun qadınların Konqreslə əlaqə saxlamasına mane olmağa çalışması barədə fikirlər "gerçəyi yansıtmır": "Biz heç kimi təhdid etməmişik və heç kimə müdaxilə etməmişik".

Konqresə müraciət edən ilk işçinin vəkili onu da qeyd edib ki, müştərisinin sözlərinə görə, son 10 ildə MKİ-də 54 qadın cinsi zorakılığın və ya həmkarları tərəfindən uyğunsuz davranışın qurbanı olduqlarını bildiriblər, ancaq onların işləri lazımi qaydada aparılmayıb.

Komitənin sədri Mayk Törner (Ohayo ştatı, respublikaçı) və komitə üzvü Jim Hayms (Konnektikut ştatı, demokrat) keçən həftə MKİ direktoru Uilyam Börnsə məktub göndəriblər. Onlar idarə rəisindən işçilərinin nədən şikayətləndiyini aydınlaşdırmasını istəyiblər. MKİ-nin yüksəkvəzifəli rəsmisinin sözlərinə görə, Börns 24 saat içində məktuba cavab verib və Konqreslə əməkdaşlıq edəcəyinə söz verib.

İdarənin sözçüsü Temmi Kupperman Torp şərh sorğusuna cavab olaraq qəzetə bildirib ki, onun qurumu "cinsi hücum və qısnamaya qarşı dözümsüzdür". Onun sözlərinə görə, direktor və MKİ ali rəhbərliyinin nümayəndələri "narahatlıqlarını anlamaq və təcili tədbirlər görmək üçün zabitlərlə görüşüblər". O həmçinin söyləyib ki, MKİ "cinsi zorakılıqdan sağ çıxanlarla yaxından işləmək üçün" şöbə yaradıb və orada bu cür problemlərə "bütün ciddiliklə" yanaşılır. Konqres komitəsinin təhqiqatına toxunan Torp vurğulayıb ki, agentlik "onu dəstəkləməyə hazırdır" və "komitəni işin gedişatı barədə bilgiləndirmək" niyyətindədir.

Telegramda izləyin