"Sülhməramlıların regionda mövcudluğuna zərurətin olub-olmaması sual yaradır" - DEPUTAT

"Şuşa rayonunun Allahqulular kəndi istiqamətindəki torpaq yolda Ermənistan tərəfindən törədilən növbəti təxribat artıq cəza tədbirləri, yaxud antiterror əməliyyatlarını zərurətə çevirir. İlk növbədə ona görə ki, ermənilər Azərbaycanın təmkinli davranışından sui-istifadə edərək müharibə cinayətlərini azğınlıqla davam etdirirlər. Belə ki, əvvəllər bu yoldan separatçıların istifadə etdiyi dövrdə hər hansı mina partlayışı baş verməyib, çünki sülhməramlılar və separatçılar tərəfindən istifadə olunurdu. Lakin bu yoldan ətrafındakı yüksəkliklərdəki mövqelərimizə təminat vasitələrini daşıyan avtomobillərimiz istifadə etməyə başladıqdan sonra hərbçilərimizin minaya düşməsi göstərir ki, minalanma son bir neçə gündə həyata keçirilib və Azərbaycan hərbçilərinin məhvinə hesablanıb. Xüsusi qeyd edim ki, burada hər hansı legitim müdafiə hüququndan söhbət gedə bilməz, çünki azərbaycanlı hərbçilər öz suveren ərazilərimizdə xidmət aparırlar".

Bu sözləri Sonxeber.az-a Milli Məclisin deputatı Bəhruz Məhərrəmov deyib.

O bildirib ki, görünən odur ki, ermənilər öz xoşları ilə revanşist niyyətlərindən əl çəkmək istəmirlər və beləliklə də sülh, təhlükəsizlik naminə hərbi məcburetmə tədbirləri qaçılmazdır.

"Nəticə nə olacaq, proqnoz vermək çətin deyil. Əlbəttə ki, bugünkü insident Ermənistana baha başa gələcək, atılacaq addımlara görə isə Azərbaycan Müdafiə Nazirliyinin də ifadə etdiyi kimi, məsuliyyət Ermənistanın hərbi-siyasi rəhbərliyinin üzərinə düşür. Ola bilsin Ermənistan yeni geosiyasi situasiyada hansısa güc mərkəzlərinə ümid etməyə başlayıb, lakin Müzəffər Ali Baş Komandanın AzTV-yə müsahibəsində də ifadə etdiyi kimi, "İkinci Qarabağ müharibəsindən keçən iki il yarım ərzində Ermənistan, onun havadarları və eyni zamanda, ona dəstək verən ölkələr və qüvvələr bizim iradəmizi, qətiyyətimizi, gücümüzü əyani şəkildə görüblər". Bugünkü hadisə eyni zamanda bir daha göstərdi ki, sülhməramlı kontingent üzərinə düşən öhdəlikləri nəinki yerinə yetirmir, əksinə sanki birtərəfli qaydada Ermənistanın və separatçıların maraqlarının ehtiva olunduğu yeni öhdəliklər müəyyən edib. Bu isə kontingentə onsuz da az olan etimadın bütün səviyyələrdə daha da azalması, sülhməramlıların bütövlükdə regionda mövcudluğuna zərurətin olub-olmaması suallarını meydana çıxarır. İstənilən halda hər kəs, Ermənistan da, onların havadarları da cənab İlham Əliyevin 4 gün öncə Salyandan ifadə etdiyi kimi, unutmamalıdır ki, "biz dəfələrlə göstərmişik ki, bu torpaqların sahibləri bizik və heç kimə imkan vermərik ki, bizim ərazimizdə kimsə at oynatsın".

Telegramda izləyin