Məktəbdə nizam-intizam niyə vacibdir? - Təhsil yalnız dərs keçməklə bitmir

Məktəb yalnız biliklərin öyrədildiyi məkan deyil. Şagirdlərin məsuliyyət, qarşılıqlı hörmət, qaydalara əməl etmək və cəmiyyət içində düzgün davranmaq vərdişləri də məhz burada formalaşır. Buna görə məktəbdə nizam-intizamın qorunması tədrisin keyfiyyəti və sağlam təhsil mühitinin yaradılması baxımından mühüm əhəmiyyət daşıyır.

Dərsə vaxtında gəlmək, müəllim və sinif yoldaşlarına hörmətlə yanaşmaq, dərs prosesinə mane olmamaq, məktəbin daxili qaydalarına əməl etmək şagird davranışının əsas göstəricilərindəndir. Bu qaydalar şagirdlərin yalnız dərs zamanı deyil, gündəlik həyatda da məsuliyyətli olmasına kömək edir.

Məktəbdə nizam-intizamın zəifləməsi isə dərs prosesinin pozulmasına, müəllimlərin mövzunu izah etməkdə çətinlik çəkməsinə və şagirdlərin diqqətinin yayınmasına səbəb ola bilər. Belə hallarda təkcə müəllimlərin deyil, məktəb rəhbərliyinin və valideynlərin də üzərinə məsuliyyət düşür.

Elm və Təhsil Nazirliyinin məlumatına əsasən, ümumi təhsil müəssisələrində şagird davranış qaydalarının pilot tətbiqinə başlanılıb. Həmin qaydalar məktəbdə fiziki təhlükəsizliyin, psixoloji sağlamlığın, məktəbdaxili münasibətlərin və əlverişli öyrənmə mühitinin təmin edilməsini hədəfləyir.

Nizam-intizamın təmin edilməsi şagirdlərin hüquq və fərdi xüsusiyyətlərinin nəzərə alınması ilə müşayiət olunmalıdır. Məqsəd uşaqları qorxu altında saxlamaq deyil, onlara qaydalara əməl etməyin, başqalarının hüquqlarına hörmət göstərməyin və öz davranışlarına görə məsuliyyət daşımağın əhəmiyyətini aşılamaqdır.

Məktəbdə nizam-intizamın formalaşması üçün müəllim, şagird və valideyn arasında əməkdaşlıq vacibdir. Çünki qaydalara hörmətin ailədə və məktəbdə birlikdə aşılanması həm tədris mühitinə, həm də uşaqların gələcək davranışına təsir göstərir.

Müəllif: İlkin Məmmədkərimov

Telegramda izləyin