"Bugünkü əfv sərəncamı bir daha göstərdi ki, cəmiyyətin humanistləşməsində ulu öndər Heydər Əliyevin qoyduğu irs davam etdirilir"- DEPUTAT

"Prezident İlham Əliyevin imzaladığı növbəti əfv sərəncamı 801 məhkumun ailəsinə böyük sevinc bəxş etdi".

Bunu Sonxeber.az-a danışan deputat Nəsib Məhəməliyev bildirib.

Deputat qeyd edib ki, 801 nəfərin 463-ü azadlıqdan məhrum etmə cəzasından, 220 şəxs azadlıqdan məhrum etmə cəzasının çəkilməmiş hissəsinin yarısından, 118 nəfər isə azadlıqdan məhrum etmə ilə bağlı olmayan digər cəzalardan azad edilib:

"Əfv olunmuş şəxslərin sayına görə müstəqillik tarixinin ən böyük sərəncamı olması, müasir Azərbaycanın qurucusu, memarı, dahi şəxsiyyət Heydər Əliyevin adı və onun 100 illik yubileyi ilə bağlıdır. Cənab prezidentin məlum sərəncamına əsasən 2023-cü il Heydər Əliyev ili elan olunmuş və ölkə daxilində və xaricində ulu öndərin 100 illiyi geniş, təntənəli şəkildə qeyd olunur. Bu gün imzalanan əfv sərəncamı bir daha göstərdi ki, bütün sahələrdə olduğu kimi, cəmiyyətin humanistləşməsində də Ulu Öndərin qoyduğu irs davam etdirilir. Cənab Prezident nə vaxtsa qanunları pozmuş və cinayət törətmiş insanları əfv etməklə humanizm prinsiplərinə sadiq qaldığını nümayiş etdirir. Əfv olunanlar arasında bəzi yerli hüquq təşkilatlarının siyasi məhbus adlandırdığı şəxslərin olması ölkə başçısının vətəndaşlar arasında ayrı-seçkiliyə yol vermədiyinin göstəricisidir".

Aysel Yusifqızı

Telegramda izləyin