Yaponiyada G7 Liderlər Zirvəsi 2023 başlayıB

G7 Zirvəsi 2023 Yaponiyanın sədrliyi ilə başlayıb.

Sonxeber.az xəbər verir ki, Yaponiyanın Baş naziri Kişida Fumionun ev sahibliyi etdiyi sammitdə ABŞ, Fransa, İngiltərə, Almaniya, Kanada və İtaliya liderləri iştirak edir.

Mayın 21-dək davam edəcək sammitə G7 ölkələri ilə yanaşı, Avropa İttifaqı (Aİ), İndoneziya, Hindistan, Cənubi Koreya, Avstraliya və Vyetnam da dəvət olunub.

Ev sahibi Yaponiyanın Baş naziri və xanımı Kişida Yuko Xirosima Sülh Memorial Muzeyinin qarşısında qonaq olan dövlət və hökumət başçılarını qarşıladılar.

1945-ci ildə atılan atom bombası dövrünə aid 100 mindən çox eksponat və qalıqların nümayiş olunduğu muzey G7 liderlərinin ilk kollektiv səfərinə səhnə olub.

Kişida cütlüyünün müşayiəti ilə qonaq liderlər və onların həyat yoldaşları, o cümlədən ABŞ prezidenti Co Bayden və həyat yoldaşı Cil Bayden tarixi muzeyi və kampusu gəziblər.

Ziyarətdən sonra liderlər kampusda atom bombası qurbanlarının xatirəsinə ucaldılmış xatirə məzarına gedərək gül çələngləri qoyublar.

Bayden 1945-ci ildə atom bombasından sonra Xirosimaya gələn ikinci ABŞ prezidenti oldu. Barak Obama 2016-cı ildə Xirosimaya səfər edib.

Qlobal siyasi və iqtisadi problemlərin həllində mühüm beynəlxalq platformalardan biri hesab edilən G7 Liderlərinin Sammiti Grand Prince Hirosima otelində keçiriləcək.

6 avqust 1945-ci ildə Xirosimaya və 9 avqust 1945-ci ildə Naqasakiyə atılan atom bombaları ilə ABŞ 210.000-ə yaxın insanın ölümünə səbəb oldu.

Telegramda izləyin