"Heydər Əliyev bizim müasir müstəqillik təfəkkürümüzün banisidir" - DEPUTAT

Konstitusiyamızın ilk cümləsində ifadə olunur ki, Azərbaycan Respublikasında dövlət hakimiyyətinin yeganə mənbəyi Azərbaycan xalqıdır. 30 il əvvəl, legitim hakimiyyətin yeganə mənbəyi olan xalq yenidən Heydər Əliyevə etibar etdi, taleyin ümidinə buraxılmış xalqa məhz Ulu Öndər sahib çıxdı.

"Heydər Əliyev bizim müasir müstəqillik təfəkkürümüzün banisidir. Kimin hansı mif uydurmasından asılı olmayaraq, etiraf edək ki, mövcudiyyəti dövründə biz SSRİ-yə öz dövlətimiz kimi yanaşmış, bu dövlətə inanmışıq. Bizim dəyərli ziyalılarımız belə əqidəli kommunist kimi Sovet dövlətini özününkü hesab edib. Bu inamla yaşayan xalqın, müstəqillik barədə düşünərək SSRİ-dən üz çevirməsi faktiki mümkünsüz idi. Amma Ulu Öndərin 1987-ci ildə siyasi hakimiyyətdən ədalətsiz formada uzaqlaşdırılması xalqın sovetlərə inamın itməsi ilə nəticələndi. Azərbaycanın müasir müstəqillik yolu da məhz bu qırılma nöqtəsindən başlanır. Təsadüfi deyil ki, Heydər Əliyevin repressiyalara məruz qalmasından cəmi bir neçə ay sonra, başlanan xalq hərəkatının ilk iştirakçılarının əllərindəki etiraz plakatları məhz Heydər Əliyevin portretlərindən ibarət idi".

Bu sözlər Sonxeber.az-a Milli Məclisin deputatı Bəhruz Məhərrəmov deyib.

O bildirib ki, bəzi hallarda tariximizi qələmə alanlar nədənsə bu məqamın üzərindən sükutla keçirlər. Hansı ki, onların çoxunun əlini qələmə də, çörəyə də Heydər Əliyev çatdırıb.

"Əlbəttə, Heydər Əliyevin böyük tarixi cılız adamların yazdığı və yazdırdığı "tarix kitablarına" sığışa bilməzdi. Çünki, o özü elə tarix yaradan dahi idi və bunu hər kəs qəbul edib və edir. Təsəvvür edin, prezidentliyi dövründə özünə, bu gün isə yoluna müxalifətdə olanlar da bu böyük şəxsiyyətin qarşısında özlərinin bir heç kim olduqlarını o dərəcə də yaxşı dərk edirlər ki, "mübarizə yolunu" ayrı-ayrı tarixi şəxsiyyətlərə uğursuz formada istinad etməkdə, Heydər Əliyev şəxsiyyətini guya onlarla üz-üzə qoymaqda görürlər. Amma unudurlar ki, istər XX-əsrin əvvəlində, istərsə də XX əsrin sonunda onların istinad etdiyi şəxslərin, biz onların da ruhunu ehtiramla anırıq, heç birinin özünün siyasi yolu olmayıb, amma Heydər Əliyevin yolu var! Çünki əgər hansısa siyasi xətt, ideya davam edirsə bu yoldur, amma etiraf edək ki, nə qədər mütərəqqi olur olsun, siyasi ideyalar faydalı formada davam etmirsə bu artıq dalandır, yol deyil. Bu gün Heydər Əliyevin davam edən yolu, suverenliyin və tərəqqinin yeganə qarantıdır.Bilirsiniz ki, Ermənistan dövləti yaranandan, yəni 1918-ci ildən Azərbaycana ərazi iddiaları var idi və 1969-cu ilə qədər bu iddialarını hissə-hissə realizə edə bilirdilər. Məhz Heydər Əliyevin simasında güclü milli iradənin hakimiyyətə gəlməsi bu gedişata son qoydu.

1969-cu ildən 1987-ci ilə qədər Qarabağda kimsə baş qaldıra bildimi???

Amma 1987-ci ildə Ulu Öndərin istefasından iki həftə keçməmiş ovaxtkı Dağlıq Qarabağ Muxtar Vilayətin Ermənistanın tərkibinə verilməsi məsələsini yenidən qaldırdılar. Heydər Əliyev hakimiyyətdə təmsil olunsaydı, kimsə bu çirkin əməllərə cürət edərdimi? Əsla! Cənab İlham Əliyevin 10-mayda Şuşadan bəyan etdiyi kimi "Heydər Əliyev amili Azərbaycanı bir çətir kimi qoruyurdu.

Yoxsa kiminsə Zori Balayana "sanballı" cavabı, yaxud kiminsə populist qəzet məqalələri sseriyası, - bunlar hansı siyasi-hüquqi nəticə verdi?

Hakimiyyətin mənimsənilməklə xalqa qarşı ən ağır cinayət törədən AXC-Müsavat cütlüyü nə edirdi? Ölkə uçruma yuvarlandığı, torpaqların işğal olunduğu bir şəraitdə, xalqın gözünün Naxçıvana dikildiyini görən o dövrkü iqtidar bütün potensialını Əliyevlə mübarizəyə səfərbər etmişdilər. Amma Ulu Öndər bu cılız, konsepsiyasız, prinsipsiz, kortəbii qaragüruhdan çox yüksəkdə dayanmışdı. Hakimiyyətə gəldikdən sonrakı dövrdə atılan addımlar, başlanan şərəfli yol barədə saatlarla danışmaq olar. Heydər Əliyevin xalq qarşısında ən böyük xidmətlərinən biri də məhz milli iradəni ifadə edən siyasi xəttin davamlılığını Cənab İlham Əliyevin timsalında təmin etməsi oldu. Cənab İlham Əliyev necəki şanlı zəfərlə son 200 ildə qarşıda duran əsas ümummilli vəzifəni həll etməklə, eləcə də həyata keçirdiyi ardıcıl tədbirlərlə Ulu Öndərin Konstitusiyada ehtiva olunan dövlətçilik konsepsiyasını - vəsiyyətini reallaşdırdı. Bu gün cənab İlham Əliyev sözün əsl mənasında Xalqının vahidliyini təcəssüm etdirir, dövlətçiliyin varisliyini təmin edir. Dövlət müstəqilliyinin, ərazi bütövlüyünün sözün əsl mənasında təminatçısı və harda yaşamasından asılı olmayaraq bütün azərbaycanlıların hamisidir. Belə bir şəraitdə qarşımızda bir vəzifə var, cənab İlham Əliyevin ətrafında sıx birləşmək. Ən azı mövcudiyyətimizi qoruimaq naminə, böyüyən övladlarımızın xoşbəxt həyatı naminə, təhülükəsizlik, sabitlik və inkişaf naminə, müstəqillik, suverenlik naminə.Bu yol davam etməlidir, İlham Əliyevin olmadığı, Heydər Əliyev ideologiyasından kənarlaşan yol milli xəyanət deməkdir".

Telegramda izləyin