Riadın atası yüksək vəzifədə çalışsa da, o həmişə ermənilərə qarşı döyüşlərdə iştirak edirdi - Elşad Həsənov

Riad Əhmədov çox vətənpərvər, vətəninə, dövlətinə, ailəsinə bağlı insan idi.

Bunu Trend-ə açıqlamasında politoloq Elşad Həsənov bildirib.

Onun sözlərinə görə, Riad Əhmədov uzun illər kəşfiyyat orqanlarında xidmət edib.

"Mənfur düşmənlərimiz torpaqlarımıza hücum edəndən sonra təhlükəsizlik orqanlarında diversiya-kəşfiyyat qrupları yaradıldı. Qrupa ilk yazılanlardan biri Riad oldu. O həmişə ön cəbhədə döyüşlərdə oldu, uğurlu kəşfiyyat planları həyata keçirdilər. Onun atası yüksək vəzifədə çalışsa da Riad bütün bunlara baxmayaraq həmişə cəbhəyə getməyə çalışır və ermənilərə qarşı döyüşlərdə iştirak edirdi", - deyə politoloq əlavə edib.

E. Həsənov deyib ki, Riadın nəşi 31 il idi ki tapılmırdı.

"Ali Baş Komandan, Cənab Prezident İlham Əliyevin komandanlığı altında 2020-ci ildə torpaqlarımız düşməndən azad edildi. Yalnız ondan sonra qəhrəmanımızın nəşinin qalıqlarını tapmaq üçün təhlükəsizlik orqanaları tərəfindən müvafiq işlər aparıldı və bunun nəticəsində Riadın nəşi Şuşanın Daşaltı kəndində tapıldı. Bu gün o əbədiyyətə qovuşdu. Gələcək nəsillər Riad kimi oğullarla həmişə fəxr edəcək", - deyə o, qeyd edib.

Qeyd edək ki, Azərbaycanın Milli Qəhrəmanı Riad Əhmədov İkinci Fəxri xiyabanda dəfn olunub.

Xatırladaq ki, Birinci Qarabağ müharibəsində itkin düşmüş və şəxsiyyətləri müəyyən edilmiş daha 10 nəfərin ötən ay meyit qalıqlarının eyniləşdirilməsinə nail olunub. Onlardan biri də Milli Qəhrəman Riad Əhmədovdur. Dövlət Təhlükəsizliyi Xidmətinin əməkdaşı olmuş Azərbaycanın Milli Qəhrəmanı Riad Əhmədov uzun müddət peşəkar zabit kimi təhlükəsizlik orqanlarında çalışıb. 1989-cu ildə erməni silahlı birləşmələri Azərbaycana qarşı elan olunmamış müharibəyə başladığı vaxtdan etibarən Riad Əhmədov bütün bacarığını Milli Ordunun yaradılmasına sərf edib, Azərbaycan Respublikası Müdafiə Nazirliyi Kəşfiyyat İdarəsinin rəis müavini vəzifəsinə təyin olunub. Riad Əhmədov 1992-ci il yanvarın 26-da rəhbərlik etdiyi kəşfiyyat qrupu ilə Daşaltı kəndindəki döyüşdə yaralanaraq itkin düşüb.

Telegramda izləyin