Xerson qubernatoru: "Suvorovun yoluyla gedib İzmaili tutmalıyıq"

Xerson vilayətinin qubernatoru Vladimir Saldo "xüsusi hərbi əməliyyat" çərçivəsində Odessa vilayətinin İzmail şəhərini tutmağı təklif edib.

O, bu mövzuda "Tavriya" telekanalına müsahibəsində danışıb.

Vilayət rəhbəri qeyd olunan yaşayış məntəqəsinə tanınmış hərbi xadimlərin yolu ilə getmək arzusunda olduğunu bildirib. Eyni zamanda o, qeyd edib ki, müvafiq torpaqlar Rusiyanın tərkibinə daxil edilməlidir.

"Biz Xersona, sağ sahilə qayıdacağıq. Bizim vəzifəmiz daha da irəli getmək, Potyomkin və Suvorovun yolunu təkrarlamaq, İzmailə çatmaq və bütün bu torpaqları Rusiya Federasiyasına qaytarmaqdır", - deyə siyasətçi izah edib.

Sentyabrın əvvəlində Vladimir Saldo bildirmişdi ki, regionun Rusiyanın tərkibində inteqrasiyası üçün əsas tədbirlər başa çatıb. Onun sözlərinə görə, Rusiyanın iqtisadi, maliyyə, kredit və hüquq sistemlərinə, dövlət orqanları sisteminə inteqrasiya tədbirlərinin təkmilləşdirilməsi və gücləndirilməsi 2026-cı ilin əvvəlinə qədər davam edəcək.

Musavat.com

Telegramda izləyin