Trampdan İrana yeni zərbə mesajı: ABŞ Yaxın Şərqə 10 min hərbçi göndərir

ABŞ-İran qarşıdurması fonunda Vaşinqtonun Yaxın Şərqdə hərbi hazırlıqlarını artırdığı barədə yeni məlumatlar yayılıb. Prezident Donald Tramp noyabrda keçiriləcək aralıq seçkilərindən sonra İrana qarşı zərbələrin yenidən gücləndirilə biləcəyini bildirib. Bunun ardınca Axios ABŞ-ın Səudiyyə Ərəbistanı və Qətərdə neft-qaz obyektlərinin müdafiəsi üçün əlavə "Patriot" sistemləri yerləşdirdiyini yazıb.

The Wall Street Journal və digər ABŞ mediasının məlumatlarına görə isə regiona təxminən 9-10 min əlavə ABŞ hərbçisinin göndərilməsi planlaşdırılır. Bu addımlar Vaşinqtonun mümkün yeni hərbi əməliyyat ssenarilərinə hazırlıq gördüyü barədə müzakirələri yenidən gündəmə gətirib.
Mövzu ilə bağlı politoloq, Resurs Analitik İnformasiya Mərkəzi İctimai Birliyinin sədri Rasim Quliyev Sonxeber.az-a açıqlamasında bildirdi ki, ABŞ-da keçiriləcək aralıq seçkilərindən sonra rəsmi Vaşinqton İran-ABŞ münasibətlərinə daha çox diqqət ayıracaq. Buna görə də indidən müxtəlif ssenarilərə hazırlıq görülür. Çünki bu qeyri-müəyyənlik artıq dünya iqtisadiyyatına da çox ciddi təsir göstərməkdədir.

Ona görə də hər iki tərəf son döyüşə və üstün mövqedə danışıqlara hazırlaşırlar. Hər halda danışıqlardan əvvəl mövqe döyüşü ola bilər. Eyni zamanda ABŞ-da keçiriləcək aralıq seçkilərinin nəticələrinin də ABŞ-İran müharibəsinə təsir göstərə biləcəyi ehtimalı da istisna olunmur.

Müəllif: İlkin Məmmədkərimov

Telegramda izləyin