"Ermənistan vəziyyəti öz xeyrinə çevirməklə beynəlxalq qüvvələrin gəlişini regiona təmin etməyə çalışır" - POLİTOLOQ

"Azərbaycan və Ermənistan arasında yekun sülh müqaviləsi imzalanmayıb. Sülh prosesi istiqamətində aparılan danışıqlar bir müddətdir ki, dayandırılıb. Bu baxımdan tərəflər hər nə qədər pozitiv mesajlar versə də, yekun sülh müqaviləsi imzalanmadan bu tip halların baş verməsi normaldır. Defakto müharibə vəziyyəti davam edir. Tərəflər bu istiqamətdə bir-birinə güc nümayişi göstərə bilərlər. Ermənistanda vəziyyətin fərqli olduğunu nəzərə alsaq bu insidentlərin hardasa baş verməsi anlaşılandır. Rusiya-Ermənistan gərginliyi fonunda Rəsmi Moskva Ermənistan daxilində müxalif qüvvələri hərəkət gətirir. Onlar Ermənistan ordusu daxilində özünə sadiq beşinci kolon nümayəndələrini aktivləşdirib. Bunun ən bariz nümunəsi Azərbaycan-Ermənistan şərti sərhədində təxribatların baş verməsi, atəşkəsin pozulması hallarının baş verməsidir".

Bu sözləri BiG.AZ-a açıqlamasında politoloq Turan Rzayev deyib. Politoloqun sözlərinə görə, Böyük ehtimalla bunun arxasında Rusiyanın özü dayanır. O, demək deyil ki, bu fonda Ermənistan günahsızdır:

"Xeyir elə deyil. Ermənistan özüdə maksimum dərəcədə prosesləri manipulyasiya edib. Vəziyyəti öz xeyrinə çevirməklə beynəlxalq qüvvələrin regiona təmin etmək, habelə Azərbaycana qarşı yeni sanksiyalar, təzyiq metodlarını icra etmək istəyir. Azərbaycan tərəfi beynəlxalq hüququ əsas götürür. Beynəlxalq hüququn prinsip və normaları, Azərbaycan Konstitusiyasında göstərilən məsələlər çərçivəsində prosesi reaksiya verəcək. Böyük ehtimalla burada atəşkəsin pozulduğu nöqtələrin vurulması mümkündür. Zərurət yaranacağı təqdirdə düşmən təxribatlarının cavabın verilməsi, hərbi konteksdə mümkündür. Azərbaycan ona qarşı təzyiqlərin yaradılmasına, Ermənistanın bundan istifadəsinə icazə verməyəcək. Buna görə də maksimum dərəcədə ehtiyatlı, bir o qədər adekvat tədbirlər görəcək".

Qeyd edək ki, oktyabrın 5-i saat 14:50-də Ermənistan silahlı qüvvələrinin bölmələri Basarkeçər rayonunun Əzizli və Aşağı Şorca yaşayış məntəqələri istiqamətlərində yerləşən mövqelərindən Ordumuzun Kəlbəcər rayonunun Yellicə yaşayış məntəqəsi istiqamətində yerləşən mövqelərini müxtəlif çaplı atıcı silahlardan atəşə tutub. Bu barədə Azərbaycan Müdafiə Nazirliyi məlumat yayıb. Qeyd olunub ki, Azərbaycan Ordusunun bölmələri şəxsi heyət və texnika sarıdan itki verməyib.

Telegramda izləyin