"Hadrutun işğaldan azad olunmasından üç il ötür" - DEPUTAT

Bu gün Xocavənd rayonunun Hadrut qəsəbəsinin işğaldan azad olunduğu gündür. Belə ki, 2020-ci il sentyabrın 27-dən başlayaraq Azərbaycan Ordusunun həyata keçirdiyi əks-hücum əməliyyatları nəticəsində Hadrut qəsəbəsi oktyabrın 9-da düşmən tapdağından azad edilib.
Qəsəbənin azad olunması xəbərini Azərbaycan xalqına Silahlı Qüvvələrin Müzəffər Ali Baş Komandanı, Prezident İlham Əliyev çatdırıb.

"Həmin gün Hadrut qəsəbəsi ilə yanaşı, Çaylı, Yuxarı Güzlək, Gorazıllı, Qışlaq, Qaracallı, Əfəndilər, Süleymanlı və Sur kəndləri də düşmən işğalından azad olunub.
Qəsəbənin və ətraf kəndlərin işğaldan azad olunması əməliyyatına Hadrut döyüşləri də deyilir. Bu döyüşlər Birinci Qarabağ müharibəsi zamanı Ermənistan qoşunları tərəfindən işğal edilmiş Hadrutda və ona bitişik kənd və yüksəkliklərdə aparılan əməliyyatdır".

Bu sözləri Sonxeber.az-a Milli Məclisin deputatı Bəhruz Məhərrəmov deyib.

O bildirib ki, əzəli torpağımız olan Ağoğlanı azad etməklə Azərbaycan Ermənistanın hərbi-siyasi mövqeyini daha da zəiflətdi, habelə informasiya müharibəsində aşkar üstünlüyə nail oldu.

"Əsgərlərimizin 28 il sonra Hadrutda Azərbaycan bayrağını yenidən ucaltması, buradan ölkə Prezidentinə məruzə etməsi ilə qəsəbənin Ermənistanın nəzarətində qaldığını bəyan edən Paşinyan və komandasının yalançılığı, saxtakar təbliğat maşını ifşa olundu. Bir sözlə, Hadrutun fəthi 44 günlük müharibə xronologiyasında starteji əhəmiyyətə malik ən şərəfli səhifələrdən biri kimi tarixə düşdü.
Bu şərəfli təqvimdə bütün şəhidlərimizə, o cümlədən də Hadrut uğrunda canından keçən oğullarımıza Allahdan rəhmət diləyirik".

Telegramda izləyin