"Fransa və ABŞ Azərbaycan-Ermənistan münasibətlərinin normallaşmasına maneə olmağa çalışır" - DEPUTAT

Xəbər verdiyimiz ABŞ Konqresinin yuxarı palatası Azərbaycana hərbi yardımın dayandırılmasını nəzərdə tutan və "2023-cü il tarixli Ermənistan Müdafiə Aktı" olan S.3000 qanun layihəsini təsdiqləyib.

Bununla bağlı Sonxeber.az-a danışan deputat Cavanşir Paşazadə bildirib ki, 907-ci düzəliş Vətən müharibəsində əldə etdiimiz möhtəşəm zəfərdən sonra ölkəmizə qarşı başladılan qarayaxma kampaniyasının bir hissəsidir:

"S.3000 qanun layihəsi ABŞ hökumətinin Azərbaycana qarşı atdığı növbəti ədalətsiz addımıdır. Qeyd edim ki, bu qanun layihəsinin müəllifi 2023-cü ilin sentyabrında Ermənistana səfər etmiş ABŞ nümayəndə heyətinə rəhbərlik edən senator Cerri Pitersdir. ABŞ hər zaman Ermənistana dəstək olub. S.3000 qanun layihəsi də ABŞ-ın Ermənistana növbəti dəstəyidir. Hesab edirəm ki, Baydenin bu sənədi imzalaması Azərbaycan-ABŞ münasibətlərinə ciddi zərbə vuracaq. Bu qanun layihəsi bir daha bizə göstərdi ki, 30 il ərzində ATƏT həmsədr ölkəsi olan ABŞ da Fransa kimi torpaqlarımızın işğal altında qalmasına maraqlı olub. ABŞ Senatının bu aktı Azərbaycana qarşı növbəti ədalətsiz qərarıdır və qəbuledilməzdir".

Deputat qeyd edib ki, hazırda Fransa və ABŞ regionda vəziyyəti yenidən gərginləşdirməyə və Azərbaycan-Ermənistan münasibətlərinin normallaşmasına maneə olmağa çalışır:

"Qərb hələ də Azərbaycanın öz gücünə ərazi bütövlüyünü bərpa etməsi ilə barışa bilmir. "Qarabağ kartı" əlindən çıxdığı üçün ABŞ yenidən 907-ci düzəlişlə Azərbaycana təziq göstərməyə çalışır. 30 il ərzində ABŞ 907-ci düzəlişdən Bakıya qarşı təzyiq aləti kimi istifadə edib. Azərbaycan xalqı 30 il ərzində qərbin ikiüzlü siyasətinə dözməli olub. Qəbul olunan heç bir qanun layihələri və qətnamələr bizi yolumuzdan döndərə bilməyəcək".

Telegramda izləyin