"USAID-in ölkəmizdə mövcudluğunu davam etdirməsi Azərbaycanın milli maraqlarına ziddir"- Bəhruz Məhərrəmov

"USAID-in ölkəmizdə mövcudluğunu davam etdirməsi və yaxud bu və ya digər formada hər hansı layihələrin həyata keçirilməsi Azərbaycanın milli maraqlarına, həmçinin Azərbaycan xalqının milli birliyi, Vətən müharibəsi və antiterror tədbirləri ilə daha da möhkəmlənmiş milli həmrəyliyinə ziddir".

Bu sözləri Milli Məclisin deputatı Bəhruz Məhərrəmov Sonxeber.az-a bildirib.

O qeyd edib ki, Vətən müharibəsi və antiterror tədbirləri dövründə Samanta Pouer özü və USAİD açıq formada tərəf kimi davranmış, bu gün də proses eyni qaydada davam edir:
"ABŞ-nin Beynəlxalq İnkişaf Agentliyi Marşal planı çərçivəsində ötən əsrin ortalarında yaradılmış, uzunmüddətli iqtisadi və sosial inkişafa yönəlmiş nəhəng təsisatdır. Bu günə qədər USAID kənd təsərrüfatı, ticarət, qlobal səhiyyə, demokratiya, humanitar yardıma dəstək istiqamətlərində, daha doğrusu, bu ad altında dövlətlərin asılılıq altına salınması istiqamətində çoxsaylı proqramlar reallaşdırıb. Açıq Cəmiyyət İnstitutunun yetirməsi olan və Sorosun dəstəyi ilə karyera qurmuş Samanta Pauerin USAID-ə rəhbər təyin olunması isə təsisatın fəaliyyətini daha da radikallaşdırmış, xüsusən İslam və Türk dünyasına münasibətdə hücumlar intensivləşib. Ümumiyyətlə, Pauer özü fəaliyyəti dövründə dəfələrlə Türkiyəni aşağılayaraq aşkar şəkildə erməni terroru və vandalizmini dəstəkləyib. Davamlı olaraq sosial şəbəkələrdə həm Sorosdan gələn tezislərə müvafiq olaraq başlanan kampaniyalar çərçivəsində, həm də öz təşəbbüsü ilə erməni lobbisi ilə həmrəylik nümayiş etdirmiş, o cümlədən Vətən müharibəsi və antiterror tədbirləri dövründə Samanta Pouer özü və USAİD açıq formada tərəf kimi davranmış, bu gün də proses eyni qaydada davam edir".

O qeyd edib ki, separatçı "liderlərinin" saxlanmasının ardınca Samanta Pauer böyük həyəcanla Ermənistana səfər etmiş və Azərbaycan-Ermənistan şərti sərhədində jurnalistlərə müsahibəsində Azərbaycanı açıq şəkildə ittiham etmiş, həmçinin Ermənistanın işğal və təcavüz siyasətini müdafiə etmişdir:

"Antiterror tədbirlərinin ardınca Azərbaycan hüquq-mühafizə orqanları tərəfindən tutulan separatçı rejimin keçmiş "liderlərinin" istintaqa verdiyi ifadələr Samanta Pauerin həm də korrupsiyalaşmış, muzdlu fiqur olduğu reallığını meydana çıxarır. Təsadüfi deyil ki, separatçı "liderlərinin" saxlanmasının ardınca Samanta Pauer böyük həyəcanla Ermənistana səfər etmiş və Azərbaycan-Ermənistan şərti sərhədində jurnalistlərə müsahibəsində Azərbaycanı açıq şəkildə ittiham etmiş, həmçinin Ermənistanın işğal və təcavüz siyasətini müdafiə etmişdir. Samanta Pauer bununla kifayətlənməyərək ABŞ Dövlət Departamentindən aldığı tezislər əsasında USAID-in imkanlarından faydalanaraq, USAID-in imkanlarını səfərbər edərək, beynəlxalq ictimai rəydə Azərbaycan əleyhinə qərəzli fon formalaşdırılması, həmçinin Azərbaycan daxilində süni qarşıdurma yaradılması istiqamətində çoxsaylı, çoxşaxəli fəaliyyətlərə start vermişdir.
Əlbəttə, belə bir fonda USAID-in ölkəmizdə mövcudluğunu davam etdirməsi və yaxud bu və ya digər formada hər hansı layihələrin həyata keçirilməsi Azərbaycanın milli maraqlarına, həmçinin Azərbaycan xalqının milli birliyi, Vətən müharibəsi və antiterror tədbirləri ilə daha da möhkəmlənmiş milli həmrəyliyinə ziddir və bu təsisata bu və ya digər formada bağlı olan bütün uzantılar dərhal ölkə ərazisindən çıxarılmalıdır".

Telegramda izləyin