"Bakıda yerləşən bəzi universitetləri işğaldan azad edilmiş rayon və şəhərlərə köçürmək olar" - DEPUTAT

Xəbər verdiyimiz kimi Prezident İlham Əliyev "Qarabağ Universitetinin yaradılması haqqında" Sərəncam imzalayıb. Sərəncama əsasən, Xankəndi şəhərində yerləşən ali təhsil müəssisəsinin əsasında Azərbaycan Respublikası Elm və Təhsil Nazirliyinin tabeliyində "Qarabağ Universiteti" publik hüquqi şəxs yaradılır. Nazirlər Kabinetinə iki ay müddətində Qarabağ Universitetinin nizamnaməsini təsdiq etmək və bu barədə Azərbaycan Respublikasının Prezidentinə məlumat vermək tapşırılıb. Nazirlər Kabineti, həmçinin universitetin fəaliyyətinin maliyyələşdirilməsi ilə bağlı zəruri tədbirlər görəcək, universitetin Xankəndi şəhərində torpaq sahəsi, tədris və yataqxana binaları, idman meydançası və digər infrastruktur obyektləri ilə təminatı məsələlərini həll edəcək.

Bununla bağlı Sonxeber.az-a danışan deputat Cavanşir Paşazadə bildirib ki, bu günün ən xoş xəbəri Qarabağ Universiteti yaradılması ilə bağlı cənab prezidentin imzaladığı sərəncam oldu:

"Qarabağ regionunda ilk ali təhsil ocağı 1969-cu ildə Azərbaycan Pedaqoji İnstitutunun filialı kimi qurulub. İnstitut 1973-cü ildən 1988-ci ilədək fəaliyyət göstərib. Ərazilərimizin işğalı dövründə isə institutun fəaliyyətini dayandırıb. Bu gün cənab prezident "Qarabağ Universitetinin yaradılması haqqında" Sərəncam imzalayıb. Əminəm ki, bu sərənacam hər bir azərbaycanlının böyük sevincinə səbəb oldu. Artıq soydaşlarımız 30 ildir həsrətində olduğu doğma yurdlarına geri qayıdırlar".

Deputat vurğulayıb ki, cənab prezident İlham Əliyevin 2022-ci il 16 noyabr tarixli Sərəncamı ilə təsdiq edilmiş "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı"na uyğun olaraq, işğaldan azad olunmuş ərazilərin yenidən qurulması, dayanıqlı inkişafı və həmin ərazilərdə yüksək həyat səviyyəsinin təminatı üçün genişmiqyaslı bərpa-quruculuq işləri həyata keçirilir:

"İşğaldan azad edilmiş ərazilərin iqtisadi potensialı, aparılan bərpa-quruculuq işləri və əmək bazarının tələbləri regionda yüksəkixtisaslı kadrların hazırlığını həyata keçirən ali təhsil müəssisəsinin yaradılmasını mütləq etdi.Bu baxımdan da düşünürəm ki, Qarabağ Universitetinin yaradılması cənab prezidentin zamanında atdığı növbəti doğru addımdır. Bundan əlavə Bakıda yerləşən bəzi universitetləri də işğaldan azad edilmiş rayon və şəhərlərə köçürmək olar. Düşünürəm ki, səlahiyyətli qurumlar növbəti illərdə bununla bağlı müvafiq addımlar ata bilər".

Telegramda izləyin