Avtobus sürücüləri nəqliyyatı idarə etməkdən başqa hər işlə məşğuldur! Hansı tədbirlər GÖRÜLMƏLİDİR?- AÇIQLAMA

Artıq neçə vaxtdır ki, avtbus sürücüləri arasında xoşagəlməz hallara rast gəlinir. Buna bir sıra halları nümunə göstərmək olar. Belə ki, 49 nömrəli avtobusun sürücüsü sükan arxasında "TikTok"da videolara baxıb. 211 nömrəli marşrut avtobusunun sürücüsü sükan arxasında tum çırtlayaraq, seriala baxıb. 60 nömrəli avtobun sürücüsü nəqliyyat vasitəsini idarə edərkən yaxınlıqda əyləşən qadın sərnişinə nömrəsini verməyə çalışıb. Bəs ictimai nəqliyyat vasitələrində baş verən bu hadisələrin səbəbi nə ilə bağlıdır? Sürücülərin psixoloji vəziyyətinin yoxlanılması ilə bağlı hansı addımlar atıla bilər?

Mövzu ilə bağlı nəqliyyat məsələləri üzrə ekspert Elməddin Muradlı Sonxeber.az-a açıqlamasında bildirib ki, Avtobusda bu cür neqativ hallar əfsuslar olsun ki, hələ də baş verməkdədir. Bu yaxınlarda gördük ki, avtobus sürücüsü sükan arxasında kinoya baxır. Digər tərəfdən telefon ilə danışır, siqaret çəkir və kofe içir. Yolda maşını idarə etməkdən başqa hər şey ilə məşğul olur:

"Bütün bunlar təhlükədir. İctimai nəqliyyata olan inamı azaldan faktorlardır. Bu gün biz ictimai nəqliyyatın inkişafından, insanları ictimai nəqliyyata həvəsləndirməkdən danışırıq. Baxın görün bəzi intizamsız sürücülər nələr edir. Onların bir hərəkəti, gördüyümüz nə qədər işin üzərindən xətt çəkir. O baxımdan düşünürəm ki, həmin hallara yol verməmək üçün geniş sürücü kontingenti yaranır. Bu gün o sürücülər niyə rahatdır? Çünki Azərbaycanda avtobus sürücüsü çatışmır. Ümumiyyətlə çatışmazlığa görə, şirkət onu işdən qova bilməz yaxud başqa şirkətdə həmin sürücüyə qucaq açacaqlar. Maaş azdır və rəsmi müqavilə ilə işə düzələn avtobus sürücüləri 800-1000 manat arası maaş alırlar. Bu da onlara sərf eləmir. Ona görə narazıdırlar və məcbur işləyirlər. Onların çoxu işdən sonra axşamları taksi sürücüsü kimi fəaliyyət göstərirlər. Yəni yanaşmalar çox dəyişkəndir. Bir sıra addımlar atılmalıdır".

Ekspertin sözlərinə görə, sürücülərin təminatı yaxşılaşmalı və üzərlərində ciddi nəzarət olmalıdır. Ona görə yüzlərlə avtobus sürücüsü Azərbaycandan didərgin düşdü. Nə vaxtkı Azərbaycanda onlayn ödəniş sistemi baş verdi, o dövrdən sürücülər xaricə axın etməyə başladılar:

"Onların əksəriyyəti Polşaya üz tuturlar. Polşada təqribən 3 min-4 min avro maaş alırlar. Bunun nəticəsidir ki, həmin sürücülər çox rahatdır və problem yaşamırlar. İş tapmaq onlar üçün çətin deyil. Bu baxımdan geniş sürücüsü heyəti formalaşsa, onların vahid bazası yaradılsa mövcud halların qarşısı alına bilər. Bununla bağlı müzakirələr gedir və olacaq. Sürücü artıq biləcək ki, bir şirkətdən nöqsan ilə qovulursa, bazada onun haqqında məlumat yerləşdiriləcək. Bu zaman onu başqa şirkətlər işə götürə bilməyəcək. Həmin sürücü artıq məsuliyyəti başa düşəcək. Hələlik nəzarət olmadığına görə, belə xaos yaranıb. Bu baxımdan düşünürəm ki, onların gələcəkdə kontingent olaraq formalaşması zamanı psixoloji və digər vəziyyətləri yoxlanılmalıdır".

Xatırladaq ki, 60 nömrəli avtobus sürücüsünün nəqliyyat vasitəsini idarə edərkən yaxınlıqda əyləşən qadın sərnişinə nömrəsini verməyə çalışması ilə bağlı şirkət tərəfindən bir sıra addımlar atılıb. Həmin işçinin kimliyi müəyyən edilərək agentliyə dəvət edilib və onun barəsində inzibati cəza tədbiri görülüb. Həmin sürücü sərnişinə qarşı çox sərt şəkildə hörmətsizlik və tərbiyəsizlik edib.

Sevda Səfərova

Telegramda izləyin