"Tezliklə Qazaxın 3 kəndi və Kərki də Azərbaycana geri qaytarılacaq" - DEPUTAT

"Qazaxın 4 kəndinin sülh yolu ilə Azərbaycana qaytarılması cənab prezident İlham Əliyevin uğurlu daxili və xarici siyasətinin nəticəsidir".

Bunu Sonxeber.az-a danışan deputat İqbal Məmmədov bildirib.

Deputat qeyd edib ki, aprelin 19-da keçirilən Azərbaycan ilə Ermənistan arasında dövlət sərhədinin delimitasiyası üzrə Dövlət Komissiyası və Ermənistan ilə Azərbaycan arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın səkkizinci görüşündə Qazaxın 4 kəndinin qaytarılması ilə bağlı razılıq əldə olundu:

"İlk olaraq Rusiya sülhməramlılarının vaxtından əvvəl Qarabağdan çıxması və daha sonra Qazax rayonunun 4 kəndinin Azərbaycana qaytarılması cənab prezident İlham Əliyevin uğurlu diplomatiyasının və 2016-cı ilin aprel ayında başlanan möhtəşəm zəfərin davamıdır. 4 kəndin sülh yolu ilə qaytarılması tezliklə Azərbaycan-Ermənistan öarasında dayanıqlı sülhün əldə olunacağın göstəricisidir. Ərazilərimizin sülh yolu ilə qaytarılması Laçın, Kəlbəcər Ağdam rayonları ilə başlad və Qazaxın 4 kəndinin azad olunması ilə davam edir".

Deputat vurğulayıb ki, Qazaxın 4 kəndinin sülh yolu ilə Azərbaycana qaytarılması Ermənistanı silahlandırmaqla regionda vəziyyəti yenidən gərginləşdirmək istəyən qüvvələrin xain planlarının növbəti dəfə iflasa uğraması deməkdir:

"Növbəti mərhələdə Ermənistan tərəfində qalmış Qazaxın 3 kəndinin və Kərkinin azad olunması məsələsi müzakirə ediləcəkdir. Əminəm ki, tezliklə bu 4 kəndin də Azərbaycana qaytarılmasının şahidi olacağıq. Bu gün Azərbaycan-Ermənistan arasında münasibətlərin normallaşdırılması istiqamətində aparılan danışıqlar prosesi ikitərəfli formatda uğurla davam edir. Hesab edirəm ki, kənar müdaxilələr olmadan Azərbaycan-Ermənistan arasında aparılan iktərəfli danışıqlar yaxın zamanda sülh müqaviləsinin imzalanması ilə nəticələncək. Ən önəmlisi isə Zəngəzur dəhlizi vasitəsilə Naxçıvana quru yolla gedə biləcəyik".

Telegramda izləyin