Korrupsiya əməliyyatları DAVAM ETDİRİLİR: Dövlətə dəyən ziyan necə HESABLANACAQ? - AÇIQLAMA

Azərbaycanda son zamanlar korrupsiya ilə əlaqədar keçirilən sayı artıb. Məsələn, Respublika Sanitariya-Karantin Mərkəzinin vəzifəli şəxsləri cinayət məsuliyyətinə cəlb ediliblər. Daha əvvəl isə Abşeron Rayon İcra Hakimiyyətinin vəzifəli şəxsinin qanunsuz əməlləri ifşa olunub. Digər tərəfdən isə "Gəncə Şəhər Birləşmiş Xəstəxanası" publik hüquqi şəxsin vəzifəli şəxsləri Hüseynov Vidadi Qaçay oğlu, Abdullayev Məhəbbət Əliş oğlu və digərlərinin qanunsuz əməlləri ilə əlaqədar həyata keçirilmiş əməliyyat-axtarış tədbirləri nəticəsində Baş prokuror yanında Korrupsiyaya qarşı Mübarizə Baş İdarəsində Cinayət Məcəlləsinin müvafiq maddələri ilə cinayət işi başlanıb.

Bu yaxınlarda isə Qusarda torpaq sahələrini rüşvət qarşılığında qanunsuz satmaqda şübhəli bilinən bələdiyyə sədri cinayət məsuliyyətinə cəlb edilib. İstintaqla Qusar bələdiyyəsinin sədri Əlfəddin Qeysəddin oğlu İbrahimovun vəzifə səlahiyyətlərini aşmaqla torpaq sahələrini qanunsuz olaraq satmasına, bilə-bilə qanunsuz hərəkətlərə görə külli miqdarda rüşvət almasına və vəzifə saxtakarlığı törətməsinə əsaslı şübhələr müəyyən edilib.

Göründüyü kimi bu kimi şəxslərin vəzifələrindən sui-istifadə edərək mənimsəmə hallarına yol verməsi dövlət büdcəsinə və iqtisadiyyata ciddi ziyan vurur. Bəs korrupsiya əməlləri ilə əlaqədar dövlət büdcəsinə dəyən ziyan necə hesablanır? Mövzu ilə bağlı Sonxeber.az-a danışan bank məsələləri üzrə ekspert, hüquqşünas Əkrəm Həsənov deyib ki, bunu tam olaraq konkret olaraq hesablamaq mümkün deyil:

"Çünki korrupsiya cinayətləri gizli cinayətdir. Yəni buna görə onu müəyyən etmək olmur ki, harada nə baş verib. Sadəcə olaraq burada "kölgə iqtisadiyyatı" anlayışı var. Yəni 30-40 faiz rəqəmlər səslənir. Bu ölkə iqtisadiyyatı üçün itkilərdir. Təbii bununla məhdudlaşmır. Azərbaycanda son illər korrupsiya cinayətlərinin qarşısı alınır və davam etdirilir. Hazırda bu istiqamətdə şəffaflıq var. Amma yenə də xeyli işlər görülməlidir və tədbirlər davam etdirilməlidir. Məsələn daşınmaz əmlak ilə bağlı müəyyən problemlər mövcuddur. O cümlədən bəzi istiqamətlərdə qapalılıq var. Bu baxımdan müəyyən problemlər aradan qaldırılmalıdır".

Qeyd edək ki, korrupsiya əməliyyatlarında qeyd edilən vəzifəli şəxslərin xidməti otaqlarında və digər ünvanlarda aparılmış axtarışlarla iş üzrə əhəmiyyət kəsb edən sənəd və başqa sübutlar aşkar edilərək götürülüb. İş üzrə bütün qanunazidd hallar tam və hərtərəfli araşdırılmaqla digər təqsirli şəxslərin müəyyənləşdirilməsi istiqamətində zəruri istintaq-əməliyyat tədbirləri davam etdirilir.

Sevda Səfərova

Telegramda izləyin