Azərbaycan Fransanı COP29-a DƏVƏT EDƏCƏK? - ŞƏRH

Fransa və ona yaxın qərb dövlətləri uzun müddətdir qarayaxma kampaniyası aparır. Fransanın Avropa və Xarici İşlər Nazirliyi Azərbaycanda guya Fransa vətəndaşlarının saxlanıldığı və hədəf alındığı barədə əsassız iddialar səsləndirib. Eyni zamanda ötən ildən rəsmi Paris COP29 tədbirinin Azərbaycanda keçirilməsinə etiraz edir. Fransa heç bir əsas göstərmədən iddia edib ki, Azərbaycan belə bir tədbir keçirə bilməz.

Makron höküməti bu gün ölkəmizə qarayaxma kampaniyası aparmaqla yanaşı, Ermənistanı silahlandırmaqla Cənubi Qafqazda müharib ocaqlarını alovlandırmağa çalışır. Fransa müstəmləkə siyasətini artırır, digər dövlətlərin daxili işlərinə qarışır, beynəlxalq tədbirlərə ev sahibliyi edən Azərbaycanın yoluna əngəl olmağa çalışır. Bütün bunları nəzərə aldıqda, rəsmi Bakı Fransanı COP29 tədbirinə dəvət edəcək?

Mövzunu Sonxeber.az-a şərh edən politoloq Turab Rzayev deyib ki, Fransa və bu ölkəyə yaxın dövlətlər Azərbaycana qarşı qaralama kampaniyası aparırlar. Xüsusilə bu kampaniya COP29-la bağlı aparılır:

"Guya ki, Azərbaycan neft ölkəsi olduğu üçün ətrafı çirkləndirir. Bu kimi ittihamlar ilə beynəlxalq tədbirin Azərbaycanda keçirilməsini istəmirlər. Azərbaycan neft-qaz ölkəsidir. Fransa Azərbaycandan daha çox neft-qaz istehsal edir. Fransanın total şirkətləri Braziliyadan Avstraliyaya, Afrikadan Hindistana qədər neft və qaz çıxarır. Rusiyanın neft bazarında demək olar ki, Fransa təmsil olunur. Karbohidrogen ehtiyatlarından istifadə etmək bu qədər pis əməldirsə, Fransa gərək özü bunlardan tamamilə imtina etsin. Fransanın total şirkətləri bizim şirkətimizdən dəfələrlə böyükdür. Azərbaycanın BƏƏ ilə böyük layihələri oldu. İşğaldan azad olunmuş ərazilərdə tamamilə yaşıl enerji konsepsiyasından istifadə ediləcək. Faktiki olaraq Azərbaycan yaşıl enerji sahəsində transformasiya həyata keçirməyə çalışır. Bütün bunları Fransa nəzərə almalıdır".

Politoloqun sözlərinə görə, Fransa bu ittihamları qəsdən irəli sürür. Onların niyyəti ətraf mühiti və təbiəti qorumaqdan ibarət deyil. Daha çox Azərbaycanın imicinə zərər vurmaqdır. Bütün bunlar isə məsələnin bir tərəfidir:

"İkinci tərəfi isə Fransanın bu addımları Azərbaycanda COP29 tədbirinin keçirilməsinə mane olmayacaq. Faktiki olaraq Fransanın atdığı bu adımlar Azərbaycan-Fransa münasibətlərinin pozulmasına səbəb ola bilər. COP29-la bağlı böyük hazırlıq işləri görülür. Fransanın COP29-a dəvət edilməməsi doğru addım olmaz. Azərbaycan hər bir dünyaya açıq olduğunu göstərməlidir. Hətta Ermənistanın bu tədbirə qatılması ilə bağlı danışıqlar aparılır. Biz niyə Fransanı bu tədbirə dəvət etməyək? Biz Avropa oyunlarına Ermənistanı dəvət etmişdik. Azərbaycan həmişə açıq qapı siyasəti yeridib. Bu baxımdan COP29 tədbirinə Fransa dəvət olunacaq. Fransa baş verənlərdən nəticə çıxarmalı, xalqlar və dövlətlərarası münasibətlərə zərər vurmamalıdır".

Sevda Səfərova

Telegramda izləyin