Ailəsi tərəfindən veqan qidalanmağa məcbur edilən 3 yaşlı uşaq dünyasını dəyişdi - VİDEO

İngiltərədə vegan pəhrizə riayət edən ana və ata 3 yaşlı oğlanlarının ölümünə səbəb olduqları üçün həbs cəzasına məhkum ediliblər.

Sonxeber.az xarici mediaya istinadən xəbər verir ki, cütlük uşaqlarına yalnız qoz-fındıq, kişmiş və soya südündən ibarət sərt pəhriz saxlayıb.

Yetərsiz qidalanma, raxit, qan azlığı və böyümə geriliyi kimi problemlərlə mübarizə aparan balaca Abiya xəstələnib.

Cütlük uşağı həkimə aparmaq əvəzinə sarımsaq və müxtəlif bitki qarışıqları ilə müalicə etməyə çalışıb. Lakin azyaşlı xəstəliyə dözə bilməyib və dünyasını dəyişib.

Ana və ata övladlarının cansız bədənini 8 gün yatağında saxlayıb, sonra bağçada 80 santimetr dərinlikdə qazdıqları çuxurda basdırıblar.

Hadisədən xəbər tutan polis ana və atanı saxlayıb. Koventri Crown Məhkəməsində baxılan işdə 42 yaşlı ata Tai Yaşarahyalah 24,5 il, 43 yaşlı ana Naiyahmi isə 19,5 il müddətinə azadlıqdan məhrum edilib. Cütlük uşağın ölümünə səbəb olmaqda və ədaləti pozmaqda günahkar bilinib.

Məhkəmədə məlum olub ki, ailə cəmiyyətdən təcrid olunmuş, öz qaydalarını müəyyən etdikləri, rəsmi səhiyyədən tamamilə imtina etdikləri "krallıq"da yaşayırlar. Prokuror Jonas Hankin cütlüyün Abiyahın fiziki ağrılarına məhəl qoymamasını "məhz təkəbbür və qəddarlıq" kimi qiymətləndirib.

Prokurorluq cütlüyün öz inancları naminə uşaqlarını bu faciəli sona sürüklədiyini bildirib.

Telegramda izləyin