"İran hakimiyyəti tezliklə mollaların ən qısa zamanda Azərbaycan xalqından üzr istəməsini təmin etməlidir" - Deputat

"İranın ali dini rəhbəri Əli Xameneyinin Qəzvin əyalətindəki nümayəndəsi, Qəzvin şəhərinin cümə imamı Əbdülkərim Abedini Azərbaycan Prezidenti İlham Əliyevin televiziya kanallarına müsahibəsindən sonra dövlətimizin başçısının ünvanına səsləndirdiyi fikirlərə görə məsuliyyət daşıyır".

Bunu Sonxeber.az-a danışan deputat Müşfiq Cəfərov bildirib.

Deputat qeyd edib ki, 7 yanvar tarixində Prezident İlham Əliyevin yerli televiziya kanallarına verdiyi müsahibədə Azərbaycan-İran münasibətlərində yaşanan çətinliklərə toxunaraq İranın bəzi dini liderlərinin Azərbaycan və Türkiyə prezidentləri, həm də xalqları təhqir etməsini təəssüf doğurduğunu, həmin mollaları cəzalandırılmalıdır və Azərbaycandan üzr istəməli olduğunu açıqlayıb:

"Lakin İran mollaları buna özlərinə yaraşan formada, öz üslubları ilə cavab verməyi üstün biliblər. Hər şeydən əvvəl mollaların bir dövlətin xarici siyasətində bu qədər söz sahibi olması, həmin dövlətin beynəlxalq imicinə zərbədir. Hər kəsə məlumdur ki, İran global siyasətdə heç də sevilən və dəstək görən dövlət deyil. Çünki bu dövlət siyasi imiclərinə müsbətə doğru dəyişmək əvəzinə daha da kobudlaşırlar. İran dövlət rəsmiləri artıq məsuliyyətlərini dərk edib mollaların təhqiramiz ifadələrinə görə üzr istəməlidir".

Deputat vurğulayıb ki, İranda siyasi məsələlərə ali dini lider və digər dövlət qurumları tərəfindən ciddi nəzarət olunur:

"Buna görə də nə Ərdəbil, nə dəki, Qəzvin şəhərinin mollaları özbaşına siyasi məsələlərə qoşulub ölkəmizə qarşı təhqiramiz ifadələri işlətmirlər. Həmçinin, bu bəyanatlar İran hakimiyyətinə başucalığı gətirmir. Əksinə Azərbaycanla ikitərəfli münasibətlərə zərbə vurur. Rəsmi Tehran bunu nəzərə almalı və İran mollalarının ölkənin xarici siyasətinə müdaxiləsinin qarşısını almalıdır.

İran hakimiyyəti tezliklə mollaların "siyasətşünaslığına" rəvac verməməli, əksinə, onların ən qısa zamanda Azərbaycan xalqından üzr istəməsini təmin etməlidir. Əks halda gələcək perspektivdə münasibətlərin pisləşməsinə məsuliyyəti məhz rəsmi Tehran daşıyacaq".

Telegramda izləyin