"Rəsmi İrəvan Qərbi Azərbaycan həqiqətlərini fərqli istiqamətlərə yönəltməyə çalışır" - DEPUTAT

Qərbi Azərbaycana qayıdış cənab Prezident İlham Əliyev tərəfindən irəli sürülən prioritet məsələlərdən biridir. Biz ədalətin bərqarar olunmasını istəyirik və bunu tarixi reallıqlara söykənərək Ermənistan hakimiyyətindən tələb edirik.

İndiki Ermənistan ərazisi tarixən yüz minlərlə azərbaycanlının vətəni olub. Tarixi Qərbi Azərbaycan torpaqları, xüsusilə İrəvan xanlığı Azərbaycan mədəniyyətinin və elminin mərkəzlərindən biri idi. Lakin, ermənilərin planlı şəkildə Qərbi Azərbaycana köçünün təşkili bölgədə qondarma Ermənistan dövlətinin yaradılması ilə nəticələndi. XX əsrdə etnik təmizləməni dövlət siyasəti səviyyəsinə yüksəldən ermənilər və SSRİ rəhbərliyi üç əsas mərhələdə soydaşlarımızın deportasiyasını həyata keçirdilər. Hər bir köçürmə prosesi xüsusi qəddarlıq və zorakılıqla icra olundu.

İndi Cənubi Qafqazda müstəqil və qüdrətli Azərbaycan dövləti mövcuddur və regionda bizim liderliyimizdə yeni geosiyasi konfiqurasiya formalaşıb. Rəsmi Bakı bütün haqlı tələblərini həm hüquqi müstəvidə, həm də lazım olduğu təqdirdə hərbi müstəvidə reallaşdırmaq iqtidarındadır. Qərbi Azərbaycana qayıdış strategiyası da həmçinin.

Ermənistan rəhbərliyi hər nə qədər həqiqətləri görməzdən gəlməyə çalışsa da, Azərbaycanın haqlı tələbləri beynəlxalq hüquq çərçivəsindədir.

Müki əhalinin deportasiyasını qadağan edən Cenevrə Konvensiyası, hər bir insanın öz vətəninə qayıtmaq hüququnu təsdiqləyən Ümumdünya İnsan Hüquqları Bəyannaməsi, İrqi ayrı-seçkiliyin ləğvi haqqında konvensiya və bununla bağlı BMT-nin digər sənədləri ölkəmizin tələblərinin hüquqi bazasını əsaslandırır.

Rəsmi İrəvan mövcud reallıqları, beynəlxalq hüququn tələblərini bildiyi üçün Qərbi Azərbaycan həqiqətlərini fərqli istiqamətlərə yönəltmək cəhdləri edir. Ancaq, ölkə rəhbərimiz İlham Əliyevin uzaqgörən və prinsipal mövqeyi Ermənistanın geri addım atacağını şərtləndirir.

Günay Ağamalı

Milli Məclisin deputatı, Ana Vətən Partiyasının sədr müavini.

Telegramda izləyin