"Davos Forumu dünya siyasətinə, beynəlxalq münasibətlərə ciddi təsirə malikdir" - Deputat

Davos – Hər il İsveçrənin Davos şəhərində keçirilən dünya liderləri və tanınmış iş adamlarından ibarət toplantıdır. Nüfuzuna görə, Davos Forumu yüksək reytinqə malikdir və bu səbəbdən də burada aparılan müzakirələrə diqqət də yüksək olur.

Azərbaycan üçün bu, yeni platforma deyil. Azərbaycanın aktiv iştirak etdiyi beynəlxalq tədbirlər sırasında Davos İqtisad Forumu (DİF) xüsusi rola malikdir. Bu forumda Azərbaycanın iştirakı 1995-ci ildən başlayıb. Həmin ilin 27-31 yanvar tarixlərində Ulu Öndər Heydər Əliyev ilk dəfə olaraq Forumda iştirak edib. Prezident İlham Əliyev də bu platformada intensiv iştirak edir və 2007-ci ildən başlayaraq dəfələrlə yaddaqalan çıxışlar edib.
Bu uğurun nəticəsidir ki, Azərbaycan 2013-cü ilin aprelin 12-də Dünya İqtisadi Forumunun iştirakçılarını Bakıda qəbul etdi. DİF təsisçisi və icraçı direktoru Klaus Şvab ölkə iqtisadiyyatının şaxələndirilməsində uğurlu iqtisadi siyasəti alqışlamışdı. Dünya İqtisadi Forumu iqtisadiyyatın rəqabətə davamlılığı baxımından Azərbaycanı 2013-cü ildə 46-cı yerdə və 4 il MDB məkanında 1-ci yerdə qərarlaşmışdı.

Bu il 55-ci iclasını keçirən Forum yanvarın 20-dən 24-dək baş tutdu. Prezident İlham Əliyevin mötəbər toplantıya növbəti dəfə qatılması da ölkəmizin ona marağının göstəricisidir. Eyni zamanda, DİF iştirakçılarının da Azərbaycana böyük marağı var.

Cənubi Qafqazda lider mövqeyə malik olan Azərbaycan hər il sosial-iqtisadi, siyasi, enerji, nəqliyyat və digər sahələrdə uğurlar əldə edir və bu nailiyyətlərə dünyanın marağı getdikcə daha da artır. Və bu maraqları daha çox böyük iqtisadi maraqlar formalaşdırır. Azərbaycan davamlı olaraq uğurlar əldə edir və beynəlxalq layihələrdə aktiv iştirak edir, qlobal tədbirlərə evsahibliyi edir. Davos Forumunda ən çox görüşlər keçirən, müzakirələr aparan və müxtəlif əməkdaşlıq təklifləri alan dövlət başçıları sırasında İlham Əliyevin xüsusi yeri var.
Reallıq odur ki, dünya enerji təhlükəsizliyinin təminatında Azərbaycanın rolu günbəgün artır. Davos İqtisadi Forumunda qlobal enerji layihələrinin şaxələndirilməsi bölgədə və dünyada əməkdaşlığın genişləndirilməsi istiqamətində önəmli amil kimi qeyd olunur. Azərbaycan neft-qaz ixracatçısı kimi beynəlxalq aləmdə mövqeyini möhkəmləndirir. Dövlət başçısının vurğuladığı kimi, Azərbaycan qazı üçün qapılar, yeni tranzit yollar açılır.
DİF-də "COP30-a gedən yol" mövzusunda panel müzakirəsi də baş tutdu. Müzakirədə Azərbaycanın ekologiya və təbii sərvətlər naziri, COP29-un prezidenti Muxtar Babayev, BMT-nin İqlim Dəyişmələri üzrə Çərçivə Konvensiyasının icraçı katibi Saymon Stil, Braziliya xarici işlər nazirinin iqlim, enerji, ətraf mühit üzrə müavini Andre Korrea do Laqo və digər yüksək vəzifəli nümayəndələr iştirak etdilər.

Dövlətimizin başçısının görüşlərinin say çoxluğu və əhatəliliyi DİF-i ölkəmiz üçün müstəsna platformaya çevirib. Ölkəmizi gözdən salmaq, onun nüfuzuna xələl gətirmək üçün var gücləri ilə çalışan bu cür ritorika fonunda Prezident İlham Əliyev Davosda böyük rəğbətlə qarşılanır. Bütün bunlar isə dövlət başçısının uğurlu liderlik xüsusiyyətinin nəticəsidir. Prezident İlham Əliyev DİF çərçivəsində dünya liderləri və aparıcı şirkət rəhbərləri ilə görüşlər keçirməklə yanaşı, eyni zamanda, təşkil olunan panellərə qatılıb, sualları cavablandırıb, ziddiyyətli sayılan məsələlərə aydınlıq gətirib.

Bu forumda iqtisadi proseslər müzakirə edilsə də, onun siyasi əhəmiyyəti də böyükdür. İqtisadi xarakter daşımasına baxmayaraq, Davos Forumu dünya siyasətinə, beynəlxalq münasibətlərə ciddi təsirə malikdir. Forum dünyanın iqtisadi mənzərəsinin şəkilləndirilməsində önəmli rol oynayır. Burada irəli sürülən yeni fikirlər, təkliflər qlobal iqtisadiyyata yeni istiqamətlər verir.

Ölkəmizin təşəbbüsü ilə həyata keçirilən mühüm regional nəqliyyat və enerji layihələrinin önəmini dünya ictimaiyyətinin diqqətinə çatdırılıb. Dövlətimizin Avropanın enerji təhlükəsizliyinin təmin edilməsində etibarlı tərəfdaş kimi mühüm rolunu diqqət mərkəzində saxlanıb. Ümumən, dövlətimizin başçısının DİF müstəvisində reallaşdırdığı fəaliyyət onu göstərir ki, Azərbaycan bu platformaya həm iqtisadi, həm də siyasi cəhətdən yanaşır. Belə yanaşma isə dövrün tələbidir.

Pərvanə Vəliyeva

Milli Məclisin deputatı

Telegramda izləyin