Hindistan USAID və Soros Fondunu ölkənin daxili işlərinə qarışmaqda ittiham etdi

Donald Tramp administrasiyası tərəfindən ABŞ Beynəlxalq İnkişaf Agentliyinin (USAID) şübhəli təşəbbüslərə maliyyə ayırdığı yeni faktların üzə çıxarılması fonunda, Hindistan bu qurumu və amerikalı milyarder Corc Sorosun fondunu ölkənin daxili işlərinə qarışmaqda ittiham edib.

Oxu.Az-ın rg.ru-ya istinadən bildirdiyinə görə, sahibkar İlon Maskın rəhbərlik etdiyi ABŞ Hökumətinin Effektivliyi Departamenti (DOGE) tərəfindən USAID-in amerikalı vergi ödəyicilərinin pullarını ziddiyyətli proqramlara xərclədiməsi ilə bağlı yeni bir sənəd dərc edilib.

Siyahıda, xüsusilə, "Hindistanda seçici fəallığının artırılması" üçün ayrılan 21 milyon dollar və "Banqladeşdə siyasi mühitin gücləndirilməsi" üçün ayrılan 29 milyon dollar kimi böyük məbləğlər yer alıb.

Xatırladaq ki, Banqladeşdə keçən ilin yazında kütləvi iğtişaşlar baş verib. Bu iğtişaşlar Hindistana yaxın olan Banqladeş hökumətinin süqutuna və ölkənin baş nazirinin Yeni Dehlidə sığınacaq axtarmasına səbəb olub.

Vaşinqtondan gələn bu açıqlamalar, USAID-in Hindistan və Cənubi Asiya regionundakı digər ölkələrdə siyasi proseslərə maliyyə ayırdığını ortaya qoyaraq, Hindistan Baş naziri Narendra Modinin yaxın ətrafında və ölkənin hakim partiyasında qəzəbli reaksiyalara səbəb olub.

Məşhur hind iqtisadçısı Sanciv Sanyal USAID-in fəaliyyətini "insanlıq tarixinin ən böyük fırıldağı" adlandırıb.

Hind siyasətçisi Amit Malviya isə bildirib ki, seçici fəallığı üçün 21 milyon dollar açıq-aydın Hindistandakı seçki proseslərinə xarici müdaxilədir.

"Bunun qazananı kimdir? Əlbəttə ki, hakim partiya deyil!", - o qeyd edib.

Siyasətçinin sözlərinə görə, Hindistanın daxili işlərinə qarışmaqda amerikalı milyarder Corc Soros və onun "Açıq Cəmiyyət" Fondu da iştirak edib. Bu fond USAID vasitəsilə maliyyələşdirilib.

"The Times of India" qəzetinin məlumatına görə, Hindistan Milli Məclisinin bir sıra deputatları da USAID və Soros Fondu vasitəsilə Hindistan və Cənubi Asiya regionu ölkələrində sabitliyin pozulması cəhdləri ilə bağlı açıqlamalar veriblər. Xüsusilə, Hindistan Konqresinin üzvü Nikişant Dubinin sözlərinə görə, məhz Nepal və Banqladeşdəki iğtişaşlara ABŞ Beynəlxalq İnkişaf Agentliyi səbəb olub.

Telegramda izləyin