Bakıda qaraçılar mağazadan oğurluq edib, satıcını döydülər - ÖZƏL XƏBƏR

Bakıda qaraçılar mağazadan oğurluq edib, satıcını döyüblər.

Sonxeber.az xəbər verir ki, hadisə 25 fevral günorta saatlarında Hüseyin Seyidzadə 206A ünvanında yerləşən geyim mağazasında baş verib.

Hadisə anı təhlükəsizlik kameralarına düşüb. Belə ki, 3 nəfər qaraçı mağazaya girib oğurluq edirlər. Onların əməlini anlayan satıcı götürdüklərini geri qaytarmalarını tələb edir. Bu zaman onlar satıcıya hücum edirlər. Onu döyməyə başlayırlar.

Sözügedən satıcı Rahilə Atakişiyeva hadisə barədə Sonxeber.az -a danışıb:

"Mağazada oturmuşdum. Əvvəlcə bir, ardınca da iki nəfər daxil oldu. Qaraçı olduqlarını anladım və dedim ki, bağlıyıq. Dedilər ki, baxıb çıxırıq. Mağazamız 2 mərtəbəlidir. Ikisi aşağı mərtəbəyə düşdü, biri isə yuxarıda qaldı. Dərhal müdüriyyətə xəbər elədim. Onlar mağazada danışa-danışa mənim başımı qatmağa çalışırdılar amma oğurluq etdiklərini gördüm. Getmək istəyirdilər ki, qapını bağladım, çıxa bilməsinlər deyə. Məndən qapını niyə bağladığımı soruşdular. Dedim ki, oğurluq elədiyinizi görürəm, götürdüklərinizi qaytarın və gedin. Əvvəlcə, inkar etdilər. Amma dedim ki, üstünüzü yoxlamasam, buraxmayacam. Bu zaman, onlardan biri cibindən oğurladıqlarını çıxardı. Həmin məhsulları aldım. Sonra bir-bir ciblərini yoxlamağa başladım. Yaşı az olanları yoxladım, amma orta yaşlı qadın imkan vermədi. Mən israr eləyəndə isə üstümə hücum elədilər. Əvvəlcə hədə-qorxu gəldi ki, bıcağımı çıxaracam və sənə vuracam. Sonra qapının açarını əlimdən aldı və verdi balaca qızlara ki, qapını açsınlar. Mane olmağa çalışdım amma məni itələdi, sonra boğazımdan yapışıb boğdu. Balacalar qapını açıb qaçdılar. Mənsə böyük olanın yupkasında tutub dartdım ki, qaça bilməsin. O da mənim saçımdan tutub dartmağa başladı. Bu vaxt yoldan keçən bir nəfər kişi gəldi və mənim saçımı qadının əlindən almağa çalışdı. Həmin qaraçı da o an qaçıb getdi. Mən həmin anın sitresindən nəsə olduğunu hiss etməmişdim. Mağazaya qayıdanda isə gördüm ki, yer qandı. Baxdım dırnaqlarım qırılıb, hətta bir dırnağım mayasından qopub. Əlim, boynum cırmaq izləri idi. Bədənimdə əllərinin izləri hələdə qalıb. Bir neçə dəqiqə sonra müdüriyyət gəldi. Polis çağırdıq. Gəldilər, izahat yazdım"

Daha sonra mağazanın sahibi ilə əlaqə saxladıq. O, bildirdi ki, hadisə ilə bağlı 19-cu polis bölməsinə şikayət ediblər, lakin hələki məsələ ilə bağlı heç bir xəbər yoxdur:

"Hadisə ilə bağlı 19-cu polis bölməsinə şikayət etdik. Lakin hələki bizə heç bir məlumat verilməyib. Bu, dəhşətli hadisədir. Niyə qaraçılarla bağlı heç bir tədbir görülmür anlamıram. Bu, qaraçıların törətdiyi ilk hadisə deyil. Heç nədən və heç kimdən qorxmurlar. Təcili olaraq bu məsələ ilə bağlı tədbir görülməlidir"

Çiçək Sadatova

Telegramda izləyin