Azərbaycan azad olunmuş torpaqların bərpasını öz vəsaiti hesabına bərpa edir

Prezident İlham Əliyevin müdrik rəhbərliyi ilə Azərbaycan ərazi bütövlüyünü və dövlət suverenliyini öz gücü hesabına bərpa etdi. Dövlətimizin başçısının müəyyənləşdirdiyi balanslaşdırılmış, milli maraqlarımıza söykənən müstəqil xarici siyasət kursu ölkəmizə beynəlxalq münasibətlər sistemində böyük hörmət qazandırıb.
Otuz ilə yaxın müddət ərzində Ermənistanın işğalçılıq siyasəti ilə bütün platformalarda mübarizə aparan Azərbaycan bununla yanaşı, böyük tərəqqi yolu keçdi. Ölkəmiz özünün möhkəm dayaqlara əsaslanan iqtisadiyyatını, qüdrətli ordusunu formalaşdırdı, beynəlxalq arenada ikitərəfli və çoxtərəfli formatlarda uğurlu əməkdaşlıq əlaqələrini qurdu.
İşğalın davam etdiyi illərdə, Vətən müharibəsi dövründə, hətta sonrakı mərhələdə çoxsaylı təzyiqlərə baxmayaraq, Azərbaycan ədalətli mövqeyindən bir addım da geri çəkilmədi. Dövlətimizin başçısının qətiyyətli iradəsi nəticəsində tarixi zəfərlər qazanıldı.
Dövlətimizin başçısı "Euronews" televiziyasına müsahibəsində bu məsələyə xüsusi toxunaraq bildirdi: "Bizim təcrübəmiz uğurlu olmuşdur və onun uğurlu olması sübuta yetirilmişdir. Yəni, biz öz resurslarımıza güvənirdik, biz suverenliyimizi və ərazi bütövlüyümüzü özümüz bərpa etdik və indi də gələcəyimizi özümüz qururuq".
Milli maraqlarla bağlı məsələlərdə hər bir dövlət öz gücünə arxalanmalıdır. Bu gün Azərbaycan dövlətinin Qarabağ və Şərqi Zəngəzuru da öz resursları hesabına yenidən qurduğunu xatırladıb. Bu, ölkəmizin iqtisadi qüdrətinin bariz göstəricisidir. Bir neçə gün öncə Azərbaycanın Xarici İşlər Nazirliyi Azərbaycan və Ermənistan arasında sülh və dövlətlərarası münasibətlərin qurulması haqqında Saziş layihəsinin mətni üzrə danışıqların yekunlaşmasına dair bəyanat yaydı. Bu da məhz Azərbaycanın təşəbbüsü və səyləri nəticəsində əldə olunan uğurdur. Belə ki, danışıqlar prosesinin heç bir vasitəçiyə ehtiyac duyulmadan, ikitərəfli əsasda davam etdirilməsi də məhz Azərbaycanın təşəbbüsüdür.
Bu gün dünyada güc amilinin çox böyük rola malikdir. Azərbaycan beynəlxalq birlik tərəfindən güclü və qalib ölkə kimi qəbul edilir. Dövlətimizin başçısının müsahibəsində qeyd etdiyi kimi, Ermənistan-Azərbaycan münaqişəsi beynəlxalq hüquq, tarixi ədalət əsasında həllini tapmış yeganə münaqişədir. Bu həlli bütün dünya qəbul edir.

Ağarəhim Baxışov – Dövlət İdarəçilik Akademiyası

Telegramda izləyin