"Problemli aparıcılar bir qayda olaraq dünyagörüşü dayaz, kasad olanlardır" - AÇIQLAMA

"Kanal S"in efirində aparıcı Nigar Fərhadın "Mən oğluma atası olmayan qızı ala bilmərəm" fikri birmənalı qarşılanmayıb. Onun fikrini cəmiyyətin müxtəlif təbəqəli insanları, ictimai xadimlər, şəhid ailələri, cəmiyyətdə önəmli mövqeyə malik insanlar sərt tənqid edib. Onlar sosial şəbəkələrdə aparıcının sərt cəzalandırılmasını tələb ediblər.

Bəs görəsən bu halların qarşısının alınması üçün hansı tədbirlər görülməlidir?

Mövzu ilə bağlı media eksperti Azər Həsrət Sonxeber.az -a açıqlama verib:

"Efirə çıxıb aparıcılıq edən şəxslər hər bir ifadələrinə diqqətlə yanaşmalıdırlar. Sadəcə ifadələrinə deyil, öz görünüşlərinə, davranışlarına da diqqət etməlidirlər. Əlbəttə ki, efirdə səsləndirilən fikirlər də qırıcı olmamalıdır. Konkret şəxsə və ya ümumi auditoriyaya yönəlik fikirlər səsləndirdikdə ifadələr çox diqqətlə seçilməlidir. Bunu etməyi bacarmaq üçün də aparıcının yetərli hazırlığı, savadı və dünyagörüşü olmalıdır. Problemli aparıcılar bir qayda olaraq dünyagörüşü dayaz, kasad olanlardır. Yəni, hər hansı yolla gəlib efirə çıxıb veriliş aparırlar, adları çəkilir, görüntüləri yayılır və onlara elə gəlir ki, dünyanın ən ağıllı adamlarıdırlar. Hətta başqalarına ağıl da öyrədirlər. Ədəb, əxlaq, tərbiyə çərçivəsini aşan bu cür davranışlar məqbul deyil. Audiovizual şura belə halları mümkün qədər tez, çevik nəzərdən keçirməli və gərəkli tədbirlər görməlidir. Efirə çıxan, aparıcılıq edən şəxslər televiziya və radio qurumları tərəfindən ciddi şəkildə araşdırılmalı və sonra efirə buraxılmalıdır. Onlara peşə davranış qaydaları təqdim olunmalı, imzalatdırılmalıdır. Yetəri qədər savadı, etik davranışları nəzərdən keçirildikdən sonra efirə buraxılmalıdırlar. Təəssüflər olsun ki, bəzən bu faktorlar nəzərə alınmadan kimlərsə efirdə aparıcılıq etməyə başlayır və daha sonra da bu tip xoşagəlməz hallarla üz-üzə qalırıq"

Çiçək Sadatova

Telegramda izləyin