Türkiyədə məşhur menecerə qarşı təhqiqatda yeni detallar üzə çıxıb

İstanbul Respublika Baş Prokurorluğunun tanınmış menecer Ayşe Barıma qarşı yürütdüyü təhqiqat çərçivəsində onun lüks villası nəzarət altına götürülüb, nağd şəkildə edilən ödənişlər diqqət çəkib.

Bu barədə Oxu.Az "Haber Global" telekanalına istinadla xəbər verir.

Məlumata görə, A.Barımın lüks villanın yerləşdiyi ərazini dörd il əvvəl altı ay müddətinə 1.2 milyon lirə (54 min manata yaxın - red.) qarşılığında icarəyə götürdüyü bildirilir.

Bununla belə, icarə ilə bağlı hər hansı bir rəsmi müqavilə bağlanmayıb və ödəniş nağd şəkildə həyata keçirilib.

Hadisə ilə bağlı məhkəmə prosesinin davam etdiyi və yaxın günlərdə işə yeni dəlil və ifadələrin əlavə oluna biləcəyi öyrənilib.

Xatırladaq ki, ötən günlərdə Ayşe Barım haqqında "Gezi Parkı" etirazlarının planlaşdırıcılarından olduğu iddiası ilə istintaq başladılıb. Onun menecerlik etdiyi səkkiz aktyor, o cümlədən Halit Ergenç, Bergüzar Korel, Nehir Erdoğan, Dolunay Soysert, Rıza Kocaoğlu, Mehmet Günsür, Ceyda Düvenci və Nejat İşler şahid qismində ifadə veriblər. Onların arasında Halit Ergenç və Rıza Kocaoğlu haqqında "yalançı şahidlik" ittihamı ilə istintaq başlanılmışdı. Adıçəkilən aktyorların müstəntiqlərə "Gezi Parkı" etirazlarına öz iradələri ilə qatıldıqlarını söyləmələrinə baxmayaraq, hadisələr başladığı dövrdə Barım ilə sıx əlaqədə olduqları müəyyən edilib. Bununla yanaşı, onların Barımı qorumaq məqsədilə yalan ifadə verdikləri vurğulanıb.

Telegramda izləyin