"Bu təşəbbüs ümumtürk mədəni irsinin qorunması və gələcək nəsillərə ötürülməsi baxımından mühüm əhəmiyyət daşıyır" - DEPUTAT

"Türk dövlətləri arasında mədəni və elmi inteqrasiyanın dərinləşdirilməsi məqsədilə ortaq türk ədəbi dilinin formalaşdırılması və bu istiqamətdə sistemli addımların atılması olduqca vacibdir. Əlbətdə, bu təşəbbüs ümumtürk mədəni irsinin qorunması, möhkəmləndirilməsi, inkişaf etdirilməsi və gələcək nəsillərə ötürülməsi baxımından mühüm əhəmiyyət daşıyır".

Bu sözləri Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb:

O, açıqlamasında qeyd edib ki, Beynəlxalq konfransda Türk dövlətləri tərəfindən ali təhsil diplomlarının və elmi adların qarşılıqlı tanınmasında mövcud olan problemlərin aradan qaldırılması və bu istiqamətdə prosedur qaydalarının təkmilləşdirilməsi məsələsi də gündəmə gətirilmişdir:

"Bu problemlərin aradan qaldırılması Türk dövlətləri arasında təhsil sahəsində əməkdaşlığın gücləndirilməsinə, tələbə və mütəxəssis mobilliyinin artmasına, o cümlədən, ortaq elmi və akademik platformaların yaradılmasına xidmət edəcəkdir.

Əminəm ki, Bakıda Beynəlxalq Türk Akademiyası və Sosial Tədqiqatlar Mərkəzinin birgə təşkilatçılığı ilə keçirilən Türk Dövlətləri Təşkilatına (TDT) üzv ölkələrin sosioloji tədqiqat nəticələrinin təqdimatına həsr edilmiş beynəlxalq konfrans Türk Dövlətləri Təşkilatının çərçivəsində strateji əməkdaşlığın genişlənməsinə töhfə verməklə yanaşı, ortaq dil, elm və təhsil müstəvisində də birliyimizin möhkəmlənməsinə şərait yaradacaqdır".

Telegramda izləyin