Ağrısız infarkt: Nadir, amma təhlükəli problem

Miokard infarktı ürəyin ciddi xəstəliklərindən biri olaraq, hələ də dünyada ölümün əsas səbəblərindəndir. Amma bəzi hallarda bu infarkt ağrısız keçir və bu, onu daha da təhlükəli edir.

Oxu.Az-ın verdiyi məlumata görə, bu barədə kardioloq, tibb üzrə fəlsəfə doktoru Sergey Vasilyev "Veçernyaya Moskva"ya danışıb.

Onun sözlərinə görə, ağrısız infarkt adlanan bu forma nadir rastlansa da (təxminən 1% hallarda), təhlükəlidir.

"Xüsusilə şəkərli diabeti və ürək-damar problemi olan kişilərdə daha çox rast gəlinir. Belə infarkt zamanı insanlar sinədə tipik ağrı hiss etmədiyi üçün, vəziyyətin ciddiliyini anlamır və həkimə gec müraciət edirlər. Əslində isə ürək əzələsi artıq zədələnir və hər dəqiqə həyat üçün risk artır", - deyə o bildirib.

Həkimin sözlərinə görə, əsas simptomlar gücsüzlük, başgicəllənmə, həddindən artıq tərləmə, həyəcan, panika hissi, təngnəfəslik (hətta sakit halda), qan təzyiqinin oynaması və ya ürəkdə ritm pozğunluğudur.

Sonda o bildirib ki, infarktın yalnız sinə ağrısı ilə olmadığını unutmaq olmaz.

"Orqanizmin verdiyi siqnalları vaxtında dinləmək həyati əhəmiyyət daşıyır", - deyə həkim sözlərini yekunlaşdırıb.

Telegramda izləyin