Qədim Misirdə pişiklərə münasibətin görünməyən tərəfi üzə çıxıb

Qədim Misirdə müqəddəs hesab edilən pişiklərin əslində ağır şəraitdə yaşadığı məlum olub.

Sonxeber.az xəbər verir ki, alimlər Vyana Təbiət Tarixi Muzeyində saxlanılan qədim Misir pişiklərinə aid 131 kəlləni araşdırıblar. Tədqiqatın nəticələri "Journal of Archaeological Science" elmi jurnalında dərc olunub.

Araşdırma zamanı nümunələrin 62 faizində müxtəlif patoloji dəyişikliklər aşkarlanıb. Bunlara diş inkişafı pozuntuları, diş əti xəstəlikləri, sağalmış sınıqlar, dişləmə izləri və sümük deformasiyaları daxildir.

Tədqiqatçılar bəzi xəsarətlərin insan müdaxiləsi nəticəsində yarana biləcəyini bildiriblər. Sümüklərdə iti metal əşyalarla vurulmaya bənzər izlər də aşkar edilib.

Alimlərin fikrincə, pişiklərin bir qismi dini mərasimlərdə istifadə olunmaq və mumiyalanmaq məqsədilə xüsusi olaraq yetişdirilib. Qədim Misirdə bu heyvanlar müqəddəs sayılır və Bastet ilahəsi ilə əlaqələndirilirdi.

Araşdırma göstərir ki, müqəddəs hesab edilmələrinə baxmayaraq, pişiklərin bir çoxu sıxlıq, qidalanma çatışmazlığı, infeksiya və stress şəraitində yaşayıb.

Telegramda izləyin