Böyük zəlzələ yaxınlaşır: Okean səviyyəsi qalxacaq, böyük daşqına səbəb olacaq

Mütəxəssislər ABŞ-nin Sakit okean sahilləri üçün yaxınlaşan təhlükə barədə xəbərdarlıq edirlər. Onların proqnozlarına görə, Kaskadiya subduksiya zonasında səkkiz bal gücündə baş verə biləcək güclü zəlzələ sahil boyunca torpağın təxminən iki metr aşağı enməsinə səbəb ola bilər. Bu, Kaliforniya, Vaşinqton və Oreqon kimi ştatlar üçün fəlakətli nəticələrə gətirib çıxara bilər.

Oxu.Az-ın verdiyi məlumata görə, bu barədə tədqiqatçıların "Live Science" jurnalında dərc olunan məqaləsində bildirilir.

Okean tektonik plitələrinin kontinental plitələrin altına batdığı Kaskadiya subduksiya zonası indiyə qədər regionda dəniz səviyyəsinin qalxmasının qarşısını alan özünəməxsus bir qalxan rolunu oynayıb. Lakin geoloji sübutların göstərdiyinə görə, burada sonuncu böyük zəlzələ 1700-cü ildə baş verib və ondan sonra sahil xətti hər il 1-3 millimetr qalxıb. Ancaq cari onilliyin sonuna qədər qlobal istiləşmə nəticəsində dünya okeanının səviyyəsinin qalxma sürəti Kaskadiyanın qalxma tempini üstələyəcək.

Alimlər 8 bal gücündə zəlzələnin bu gün baş verdiyi ssenarini modelləşdirərək, onu 2100-cü ildə dəniz səviyyəsinin 0.4-0.9 metr qalxması gözlənilən vəziyyətlə müqayisə ediblər. Modellər göstərir ki, su altında qala biləcək ərazi bu gün zəlzələ zamanı 300 km² olduğu halda, gələcəkdə 370 km²-yə qədər arta bilər. Bundan başqa, əlavə 17 710 nəfərin həyatı təhlükə altına düşə bilər (hazırda bu rəqəm 8 120-dir).

Mütəxəssislər xəbərdarlıq edirlər ki, iqlim dəyişikliyi səbəbindən dəniz səviyyəsinin qalxması ilə birlikdə baş verəcək belə "böyük zəlzələ" sahilboyu yaşayış məntəqələrinin görünüşünü tamamilə dəyişə bilər: şəhərlər və qəsəbələr həmişəlik suyun altında qalacaq.

Telegramda izləyin