Köhnə fleşkartı atmayın: 5 faydalı istifadə üsulu

Bir vaxtlar faylların saxlanılması və ötürülməsi üçün ən çox istifadə olunan USB fleşkartlar indi əvvəlki qədər populyar deyil. Lakin evdə qalan köhnə fleşkartları atmağa tələsməyin.

Sonxeber.az fləşkartın kompüterin təhlükəsizliyini artırmaqdan tutmuş avtomobildə musiqi dinləməyə qədər yenidən istifadə etməyin beş maraqlı üsulunu təqdim edir.

1. Kompüter üçün ehtiyat əməliyyat sistemi hazırlayın

Köhnə fleşkartdan istifadə etməyin ən faydalı yollarından biri onu əməliyyat sisteminin bərpası və ya yenidən quraşdırılması üçün hazırlamaqdır.

"Windows 11" və ya "macOS" əməliyyat sistemini adi USB fleşkartdan daimi işlətmək yaxşı seçim deyil. Çünki onun sürəti müasir SSD qurğularından xeyli aşağı ola bilər.

Lakin fövqəladə hallar üçün yüklənə bilən USB yaddaş qurğusunun olması çox faydalıdır.

Məsələn, kompüterin əməliyyat sistemi zədələnərsə və cihaz açılmazsa, belə fleşkart vasitəsilə bərpa alətlərini işə salmaq, sistemi yenidən quraşdırmaq və bəzi hallarda vacib faylları xilas etmək mümkündür.

Xüsusilə proqram xətası səbəbindən "Windows" açılmadıqda bu üsul köməyə çata bilər.

Yüklənə bilən fleşkart hazırlamaq üçün müəyyən texniki biliklər tələb olunur.

"Windows" istifadəçiləri "Microsoft"un, "Mac" sahibləri isə "Apple"ın rəsmi təlimatlarından yararlana bilərlər.

Mütəxəssislər belə yaddaş qurğusunu kompüter normal işləyərkən hazırlamağı tövsiyə edirlər.

Çünki kompüter artıq açılmırsa və BIOS və ya UEFI ekranında qalırsa, bərpa fleşkartı yaratmaq üçün başqa kompüter lazım ola bilər.

2. Avtomobildə internet olmadan musiqi dinləyin

Müasir musiqi platformaları milyonlarla mahnıya çıxış imkanı yaradır. Yeni avtomobillərin multimedia sistemləri isə musiqini hətta səsli əmrlərlə idarə etməyə imkan verir.

Lakin bu rahatlığın müəyyən çatışmazlıqları var.

Musiqi platformalarının ödənişli abunəliyi əlavə xərc tələb edir. Bundan başqa, internet bağlantısı zəif olduqda və ya tamamilə kəsildikdə musiqi dinləmək çətinləşə bilər.

Bunun alternativi sevimli mahnıları USB fleşkarta köçürməkdir.

Fleşkartı avtomobilin multimedia sisteminə qoşaraq internet olmadan musiqi dinləmək mümkündür.

Ancaq əvvəlcə avtomobilin USB yaddaş qurğusundan musiqi oxuma funksiyasını dəstəkləyib-dəstəkləmədiyini yoxlamaq lazımdır.

Bu məlumatı avtomobilin istifadəçi təlimatından və ya multimedia sisteminin parametrlərindən öyrənmək olar.

Nəzərə almaq lazımdır ki, bəzi avtomobillər yalnız müəyyən səs formatlarını dəstəkləyir və bütün musiqi siyahılarını tanımaya bilər.

3. Fleşkartı kompüterin təhlükəsizlik açarına çevirin

USB fleşkartdan kompüterin kilidlənməsi və kilidinin açılması üçün fiziki təhlükəsizlik açarı kimi də istifadə etmək mümkündür.

Məsələn, "USB Raptor" adlı xüsusi proqram "Windows" əməliyyat sistemli kompüterlərdə belə müdafiə mexanizmi yaratmağa imkan verir.

İş prinsipi olduqca sadədir.

Proqram fleşkarta girişin yoxlanılması üçün xüsusi fayl yazır.

USB yaddaş qurğusu kompüterə qoşulu olduqda sistem açıq qalır.

Fleşkart çıxarıldıqda isə proqram kompüteri avtomatik kilidləyə bilir.

"USB Raptor" əlavə imkanlar da təqdim edir.

Məsələn, lokal şəbəkədə bir neçə kompüterin kilidinin eyni vaxtda açılmasını tənzimləmək mümkündür.

Fleşkart itirildikdə isə ehtiyat paroldan istifadə etməklə kilidi açmaq olar.

Lakin bu üsul hər kəs üçün uyğun deyil.

Çünki USB açarı daim özünüzlə gəzdirməlisiniz. Onun itirilməsi əlavə çətinliklər yarada bilər.

Bundan başqa, belə proqram əsas əməliyyat sistemi təhlükəsizliyini və etibarlı parolu əvəz etmir.

4. Vacib sənədlərinizi təhlükəsiz saxlayın

Köhnə fleşkartdan mühüm sənədlərin ehtiyat nüsxələrini saxlamaq üçün də istifadə etmək olar.

Buraya şəxsiyyət vəsiqəsinin, pasportun, sürücülük vəsiqəsinin, doğum haqqında şəhadətnamənin, daşınmaz əmlak sənədlərinin və digər vacib sənədlərin elektron surətləri daxildir.

Rəsmi prosedurlar zamanı sənədlərin əsli tələb olunsa belə, onların rəqəmsal surətləri lazımi məlumatları tez tapmağa kömək edə bilər.

Məsələn, sənədin nömrəsini və ya qeydiyyat məlumatlarını öyrənmək lazım gəldikdə fleşkartdakı fayllardan istifadə etmək mümkündür.

Lakin belə sənədləri sadəcə USB yaddaş qurğusuna köçürmək kifayət deyil.

Fleşkart itərsə və ya başqa şəxsin əlinə keçərsə, məxfi məlumatlarınızın təhlükəsizliyi risk altında qala bilər.

Buna görə də faylları güclü şifrələmə vasitəsilə qorumaq tövsiyə olunur.

Bu məqsədlə pulsuz "VeraCrypt" proqramından istifadə etmək mümkündür.

Proqram yalnız düzgün parol daxil edildikdən sonra açılan şifrələnmiş yaddaş sahəsi yaratmağa imkan verir.

Mütəxəssislər xüsusilə vacib məlumatlar üçün üç ehtiyat nüsxə saxlamağı məsləhət görürlər.

Birinci nüsxə kompüterdə, ikinci nüsxə USB fleşkartda, üçüncü nüsxə isə bulud yaddaşında saxlanıla bilər.

Bu üsul cihazlardan biri sıradan çıxdıqda və ya itirildikdə məlumatların tamamilə yox olmasının qarşısını almağa kömək edir.

Lakin köhnə fleşkartlar zamanla sıradan çıxa bildiyindən vacib sənədlərin yeganə nüsxəsini onlarda saxlamaq düzgün deyil.

5. Köhnə oyunlardan ibarət şəxsi kolleksiya yaradın

Köhnə USB fleşkartlar klassik kompüter və konsol oyunlarını saxlamaq üçün də yararlıdır.

Retro oyun həvəskarları köhnə videooyunları müasir cihazlarda işə salmaq üçün emulyator adlanan xüsusi proqramlardan istifadə edirlər.

Bu proqramlar əvvəlki nəsil oyun konsollarının iş prinsipini təqlid edərək klassik oyunların yeni cihazlarda işləməsinə imkan yaradır.

Oyun fayllarını bir fleşkartda toplamaq və uyğun cihazlar arasında daşımaq mümkündür.

Belə kolleksiya xüsusilə "Steam Deck" və ya "Raspberry Pi" istifadəçiləri üçün faydalı ola bilər.

Bu halda oyunları hər dəfə internetdən yükləməyə və ya cihazlar arasında simsiz sinxronlaşdırma aparmağa ehtiyac qalmır. (lent.az)

Telegramda izləyin