Pişiklərlə böyük ağ köpəkbalıqlarının ortaq cəhəti tapıldı

Alimlər pişiklərlə köpəkbalıqlarının eyni görmə mexanizmini paylaşdıqlarını aşkarlayıblar. Belə ki, istər yaşayış mühitinə, istər növünə, istərsə də quruluşuna görə tamamilə fərqli olan bu canlıların hər ikisinin gözləri qaranlıqda parıldayır.

Oxu.Az-ın verdiyi məlumata görə, bu barədə "IFLScience" xəbər yayıb.

Alimlər bildirirlər ki, bu parıltının səbəbi eyni bioloji quruluşdur - "tapetum lucidum". Bu, gözün tor qişasının arxasında yerləşən "parlaq qat" adlanan xüsusi bir təbəqədir. O, işığı əks etdirərək göz reseptorlarına ikinci dəfə işıq alma şansı verir. Bu sayədə heyvanlar çox zəif işıqda belə aydın görə bilir.

Böyük ağ köpəkbalıqları səhər və axşam, yəni işığın zəif olduğu saatlarda ov edirlər. Onların gecə görməsi insanla müqayisədə 10 dəfə güclüdür.

Gözlərindəki "tapetum lucidum" qatında quanindən ibarət kristallar var - bu, dərin sulu canlılarda rast gəlinən qədim xüsusiyyətdir.

Ev pişiklərinin gözlərindəki bu qat isə riboflavin-sinkdən ibarət kristallarla zəngindir. Bu struktur onlara gecə ov zamanı, ay işığında belə ətrafı görməyə imkan verir.

Alimlər hesab edirlər ki, bu bənzərlik konvergent təkamül nümunəsidir - yəni tamamilə fərqli canlılar oxşar mühit şəraitində eyni funksional həll yolu tapıblar. Burada həlledici amil az işıq şəraitində görmə tələbatı olub.

Ancaq gözlərdəki bu qat həm də görüntünün bir qədər bulanıq olmasına səbəb olur. Məsələn, köpəkbalıqları daha az dəqiqliklə görür, pişiklər isə parlaq işıqda zəif görə bilərlər.

Telegramda izləyin