Saç tökülməsinin qarşısını almağa kömək edəcək ev vasitəsi: Soğan SUYU

Saç tökülməsinin qarşısını almaq, saç köklərini möhkəmləndirib böyüməni stimullaşdıran soğandan hazırlanan təbii vasitə ilə mümkündür.

Lent.az xarici mediaya istinadən məlumat verir ki, bu vasitəni ev şəraitində hazırlamaq hər kəs üçün əlçatandır, lakin bəzi vacib nüanslara diqqət yetirmək lazımdır.

Soğanın saçlar üçün faydası

Amerikalı həkim Erik Berqin sözlərinə görə, qırmızı soğan tərkibindəki kükürd sayəsində orqanizmin saçlarda əsas zülal olan keratini sintez etməsinə kömək edir. Bundan əlavə, bu kəskin tərəvəzlər saç follikullarının böyümə hormonlarını artıran ən çox kversetin maddəsini ehtiva edir. Soğan həmçinin güclü antimikrob təsirə malikdir və baş dərisini göbələk, maya, kif və kəpəklərin həddindən artıq artımından qoruyur.

Saç tökülməsinə qarşı soğan vasitəsi

Berq bildirib ki, ev şəraitində hazırlanmış soğan saç tökülməsinə qarşı effektli vasitə ola bilər. Hazırlamaq üçün sadəcə qırmızı soğanı xırdalayıb əzmək, sonra da qarışığı tənzifdən süzərək maye hissəsini ayırmaq lazımdır.

Duş zamanı nəmlənmiş saçlara bu soğan suyunu masajla tətbiq edin və bir neçə dəqiqə ərzində saç diblərinə sürtün. Daha sonra saçları iki dəfə şampunla yuyun ki, soğanın qoxusu tam aradan qalxsın.

Aparılmış bir tədqiqat göstərib ki, soğan suyunun baş dərisinə çəkilməsi, bəzi insanlarda yenidən saç çıxmasına səbəb ola bilər. Bu tədqiqatda ocaqlı alopesiya (ləkə şəkilli, izsiz saç tökülməsi) diaqnozu olan iştirakçılar iştirak ediblər.

Cəmi iki həftə ərzində gündə iki dəfə soğan suyu tətbiq edildikdən sonra saç artımı müşahidə olunub. Dörd həftə ərzində iştirakçıların təxminən 74 faizi, altı həftə ərzində isə təxminən 87 faizi saçların yenidən çıxmağa başladığını bildirib. Hərçənd bu, tanınmış ev üsulu olsa da, onun effektivliyinin tam təsdiqlənməsi üçün əlavə elmi tədqiqatlara ehtiyac var.

Berqin sözlərinə görə, soğan suyunu həftədə iki dəfə, təxminən altı həftə ərzində tətbiq etmək kifayət edir.

Effektini artırmaq üçün nə etmək lazımdır?

Ekspert soğan suyunun təsirini gücləndirmək üçün ona 5 damcı rozmarin yağı əlavə etməyi tövsiyə edir. Çünki bu yağda saç böyüməsi ilə əlaqəli fitonutrientlər mövcuddur və ümumi sağlamlıq üçün də faydalıdır. Lakin qeyd olunur ki, bu vasitə möcüzəvi nəticə vəd etmir, çünki saç sağlamlığını qorumaq üçün düzgün qidalanma və xüsusilə kifayət qədər D vitamini qəbulu vacibdir.

Saç tökülməsinin səbəbləri

Saç tökülməsi (alopesiya) genetik meyillər, hormonlar, sağlamlıq problemləri, stress və həyat tərzi kimi müxtəlif faktorlarla əlaqəli ola bilər. Ən çox rast gəlinən səbəb irsi saç tökülməsidir – kişilərdə və qadınlarda androgenetik alopesiya kimi tanınır.

Bundan başqa, ocaqlı alopesiya (autoimmun xəstəlik), telogen effluvium (stress və ya travmadan sonra müvəqqəti tökülmə) və çapıqlı alopesiya (saç follikullarının zədələnməsi səbəbilə daimi tökülmə) kimi hallar da saç tökülməsinə səbəb ola bilər.

Telegramda izləyin