Dəniz sevdası və cib yükü: Çimərliklərdə istirahət neçəyə başa gəlir?

İyunun 15-dən etibarən çimərlik mövsümü start götürüb.

Yaydan zövq almaq istəyənlər isti qum, dəniz dalğası və həzin meh üçün çimərliklərə üz tuturlar.

Çimərlikdən zövq alanlar ilə yanaşı, qiymətlərdən şikayətlənənlər də az deyil. Dənizdə çimmək üçün üz tutulan bəzi məkanlarda alınan ödənişlər narazılığa səbəb olub.

Oxu.Az ərazilərin bir qismində çimərliyə giriş üçün tələb olunan ödənişlər barədə məlumat almaq üçün sorğu keçirib.

Qızılqum və Bilgəh çimərliyində giriş sərbəst və ödənişsizdir. Bura üz tutanlar isə özləri il istədikləri ləvazimatları və qidaları gətirə bilərlər.

Bir neçə çimərlikdə isə yalnız dənizdə çimmək istəsəniz də, müəyyən məbləğdə ödəniş edilməlidir. Belə çimərliklərdən biri də Nardaran ərazisində yerləşir. Burada 10 yaşına qədər olan uşaqlar üçün giriş ödənişsizdir, lakin 10 yaşdan 16 yaşa qədər 20 manat, 16 yaşdan böyük olanlar 50 manat ödəniş etməlidirlər. Qiymətə isə geyim otaqlarından, dəsmallardan, hovuzdan istifadə, habelə həm dəniz, həm də hovuz kənarında istirahət üçün çətirlər, stol-stullar, şezlonqlar ilə təmin olunma daxildir.

Novxanıda yerləşən çimərlikdə istirahət etmək istəyənlər üçün dənizə giriş ödənişsizdir, lakin istidən yaxa qurtarmaq istəyənlər üçün kölgəliklər, stol-stullar, şezlonqlar ödənişlidir. Bura üz tutan sakinlər özləri ilə diri qarpız və yemişdən savayı, istənilən qida və ləvazimatları gətirə bilərlər. Ərazidə 4 nəfərlik stol-stul 15 manata, şezlonqlar 5 manata, kölgəliklər isə 20-25 manata təklif olunur.

Şıx çimərliyində də yalnız dənizdə istirahət etmək istəyənlər ciblərinə qənaət edə bilərlər. Belə ki, ərazidə dənizə giriş ödənişsiz, yemək və müxtəlif ləvazimatların gətirilməsi sərbəstdir. Yalnız hovuz və ərazidə yerləşən şezlonq, çətirlər və stol-stullardan istifadə üçün öncədən 20 manat ödəniş edilməlidir.

İstirahət üçün Ramanada yerləşən çimərliyi seçmək istəyənlər həftəiçi 20 manat, həftəsonu isə 30 manat ödəniş etməlidirlər. Qiymətə stol-stuldan, şezlonq, çətir və s. kimi ləvazimatlardan istifadə daxildir. Əraziyə əlavə qida və ləvazimatlar ilə daxil olmaq

Sözügedən ərazidə yerləşən bir başqa məkanda isə hovuzdan istifadə və yuxarıda qeyd olunan xidmətlərdən yararlanmaq üçün 20 manat ödəniş edilir. Hovuzdan istifadə etmək istəməyib dənizə üz tutanlar üçün isə giriş ödənişsizdir, həmçinin onlar şezlonq və çətirlərdən ödənişsiz şəkildə istifadə edə bilərlər. Əraziyə isə 0.5 litr sadə su və uşaq yeməkləri xaric əlavə vasitələrin, qidaların daxil edilməsinə icazə verilmir.

Telegramda izləyin