Zooparkdan qaçan aslanın hücumuna məruz qalan kişi: "Bu hadisədə yalnız mən və aslan günahsızıq"

Antalyanın Manavgat rayonunda heyvan parkından qaçan aslanın hücumuna məruz qalaraq yaralanan Süleyman Kır, hadisə sonrası yaşadığı qorxu və çətin müalicə prosesindən danışıb. O, bu hadisədə tək günahsız tərəfinin özü və aslan olduğunu bildirib.

Sonxeber.az türk mediasına istinadən xəbər verir ki, hadisə 6 iyul gecəsi baş verib. "Zeus" adlı aslan zooparkdan qaçaraq tarlasında işləyən 53 yaşlı Süleyman Kıra hücum edib. Qulaq nahiyəsində kəsik, üzündə, bədənində və ayaqlarında yaralar alan Kır xəstəxanada müalicə olunaraq evə buraxılıb. Ayağındakı dərin diş izləri səbəbindən ayaq üstə durmaqda çətinlik çəkdiyini deyən Kır, hər həftə Akdeniz Universiteti Xəstəxanasına kontrol üçün getdiyini bildirib.

"Çox ayaq üstə qalsam ayağımdakı yara ağrıyır. Daha çox evdə dincəlirəm," – deyə Kır qeyd edib. O, aslanın öldürülməsinə qarşı çıxaraq belə deyib: "Aslanı öldürməsəydilər, sadəcə yuxulatsaydılar, yaxşı olardı. Bu hadisədə günahsız olan yalnız mən və aslandır. Günahkar kimdirsə, – bu yeri quran, ruhsat verən, yoxlayan, icarəyə verən – hamısı araşdırılsın və cəzasını alsın."

Hadisədən sonra ailəsinin və işçilərinin qorxu içində olduğunu deyən Kır belə danışıb: "Tarlam heyvanat parkına çox yaxındır. İşçilər getməkdən qorxur, uşaqlarım belə tarlaya girməyə çəkinir. ‘Yenə qaçar?’ deyə qorxuruq. Hər an başımıza bir şey gələcəkmiş kimi hiss edirik. Eşim psixoloji müalicə görür, mən isə gecələr tez-tez aslanla və ya başqa heyvanlarla boğuşduğum kabuslar görürəm."

Hadisə necə olmuşdu?

Manavgatın Ilıca məhəlləsində, D-400 magistral yolu yaxınlığındakı heyvan parkından qaçan "Zeus" adlı aslan, tarlasında çalışan Süleyman Kıra hücum edərək ağır yaralanmasına səbəb olmuşdu. Hadisədən sonra aslan meşəlik əraziyə qaçmış və zərərsizləşdirilmişdi. Manavgat Bələdiyyəsinin zabitləri heyvan parkını bağlayıb, müəssisə sahibi isə polis tərəfindən saxlanılsa da, məhkəmə tərəfindən şərti azadlığa buraxılmışdı.

Telegramda izləyin