İspaniyada böyük ailə ilə bağlı 5600 il əvvəl baş verən dəhşətli hadisə (TƏDQİQAT)

Yeni araşdırmaya görə, 5600 il əvvəl Pireney yarımadasında yerləşən El-Mirador mağarasında neolit dövrünə aid bir ailə qətlə yetirilib, dərisi soyulub, bişirilib və yeyilib.

Qaynarinfo "Live Science" jurnalına istinadən xəbər verir ki, ən azı 11 nəfərin - böyüklər, yeniyetmələr və uşaqların - hərbi xarakterli hannibalizmin qurbanı olması ehtimal edilir.

Mağarada tapılan sümüklərdə kəsik izləri, insan diş izləri, iliyi çıxarmaq üçün edilən sınıqlar və bişirmə əlamətləri aşkar edilib. Alimlər bu hadisənin qısa müddətdə – ehtimal ki, bir neçə gün ərzində – baş verdiyini və neolit dövrünün son mərhələsində, bölgədə əkinçilik və təsərrüfat işlərinin yayılmağa başladığı dövrdə yaşandığını bildirirlər.

Tədqiqat müəlliflərindən olan Kataloniya İnsan Paleoekologiyası və Sosial Təkamül İnstitutunun (IPHES) və Rovira-i-Virxili Universitetinin araşdırmaçısı Fransesk Marjinedas deyib:

"Bu nə dəfn mərasimi idi, nə də aclıq səbəbilə görülən tədbir. Məlumatlar hadisənin sürətlə baş verdiyini və qonşu kənd təsərrüfatı icmaları arasında baş vermiş zorakı toqquşma ola biləcəyini göstərir".

Bu, El-Mirador mağarasında aşkar edilən ilk kannibalizm nümunəsi deyil. 2000-ci illərin əvvəlində arxeoloqlar burada eyni izləri daşıyan altı nəfərin qalıqlarını aşkarlamışdı, lakin onlar təxminən 4600–4100 il əvvələ aid erkən tunc dövrünə məxsus idi və sonrakı qazıntılarda tapılan yüzlərlə qədim sümük nümunəsi ilə əlaqəli deyildi.

Yeni tədqiqat zamanı tapılan sümüklərin radio-karbon analizinə əsasən, onların yaşı 5709–5573 il arasında dəyişir. Kimyəvi analiz göstərib ki, bu şəxslər bölgənin yerli sakinləri olub və qısa müddət ərzində öldürülüblər. Qurbanların yaşı 7-dən kiçik uşaqlardan 50-dən yuxarı böyüklərə qədər müxtəlif olub. Ehtimal edilir ki, onlar bir və ya bir neçə böyük ailənin üzvləri olub.

Alimlərin fikrincə, bu yeni nümunə neolit dövründə geniş yayılmış qrup­lararası zorakılıq haqqında məlumata uyğun gəlir. Araşdırma müəlliflərindən biri, Merida Arxeologiya İnstitutunun və IPHES-in əməkdaşı Antonio Rodrigez-İdalqo qeyd edib:

"Münaqişələr və onların qarşısını almaq və idarə etmək strategiyaları insan təbiətinin bir hissəsidir. Etnoqrafik və arxeoloji məlumatlar göstərir ki, hətta az saylı və sosial baxımdan az təbəqələşmiş icmalarda belə zorakılıq epizodları baş verə bilər və düşmənlərin tamamilə məhv edilməsi halları yaşana bilər".

Telegramda izləyin