Qardaşlar arasında miras üstündə mübahisə qanla bitdi

Şanlıurfanın Devteyşti məhəlləsində dəhşətli hadisə baş verib.

Sonxeber.az türk mediasına istinadən xəbər verir ki, 48 yaşlı Ahmet Yıldız, miras üstündə mübahisə etdiyi 59 yaşlı qardaşı Ali Yıldızı tüfənglə vuraraq qətlə yetirib.

Hadisə axşam saatlarında yaşanıb. İddiaya görə, miras məsələsinə görə aralarında yaranan mübahisə qısa müddətdə böyüyüb. Bu zaman Ahmet Yıldız üzərində gəzdirdiyi tüfənglə qardaşına atəş açıb.

Ağır yaralanan Ali Yıldız qanlar içində yerə yıxılıb. Hadisəni görənlərin xəbərdarlığı ilə əraziyə polis və təcili tibbi yardım briqadası cəlb olunub. Həkimlərin müdaxiləsinə baxmayaraq, Ali Yıldızın həyatını itirdiyi müəyyən edilib.

Cinayətdən sonra hadisə yerindən qaçan Ahmet Yıldız polis tərəfindən qısa müddətdə, cinayət aləti tüfənglə birlikdə saxlanılıb. Ali Yıldızın meyiti otopsi aparılması üçün Məhkəmə-Tibb Qurumu morquna göndərilib.

Faktla bağlı istintaq davam etdirilir.

Telegramda izləyin