"Küçələrdə aparılan təmir işləri elə təşkil olunmalıdır ki, proses mümkün qədər qısa müddətdə və operativ şəkildə başa çatsın" - AÇIQLAMA

"Keçən payız Sumqayıt-Bakı yolunda sıxlıq Xırdalan qəbiristanlığı və ya ekoloji postun yanında başlayırdı. Bu il sentyabrda isə az qala Mühəndislik Universitetinin yanında başlayır".

Bunu deputat Razi Nurullayev sosial şəbəkə hesabında bildirib.

Onun sözlərinə görə, Bakı ətrafında yaşayanlar üçün şəhərə gəlmək böyük problemdir: "Binəqədi yolundan da keçmək mümkün deyil. İki aydır ki, yol qazılır, amma başa çatdırılmır. Bir kilometr yolu qazıb kanalizasiya borusu basdırmaq bu qədərmi çəkməlidir?

Nəqliyyat və yolla bağlı işlər görülür. Məncə işlərin daha da sürətlənməsi və 24 saatlıq rejimə keçilməsi lazımdır ki, layihələr daha tez bitsin. Düşünürəm ki, 10-15 sentyabrdan sonra daha ağır vəziyyətlə üz-üzə qalacağıq".

Bəs görəsən bu problemlərin həlli yolu nədir?

Nəqliyyat eksperti Elməddin Muradlı bu barədə Sonxeber.az -a açıqlama verib:

"Küçələrdə aparılan təmir işləri elə təşkil olunmalıdır ki, proses mümkün qədər qısa müddətdə və operativ şəkildə başa çatsın. Hazırda Binəqədi rayonu da daxil olmaqla bir neçə ərazidə təmir işləri davam edir. Təəssüf ki, bu işlər çox vaxt aparır və sakinlər bundan əziyyət çəkir, sosial şəbəkələrdə tez-tez narazılıqlarını ifadə edirlər.

Əslində xırda həcmli işlərin bu qədər uzanması yolverilməzdir – onlar daha sürətli tamamlanmalıdır. Lakin bəzi iri layihələr var ki, onların həyata keçirilməsi təbii olaraq vaxt tələb edir. Bu hallarda işlərin süni şəkildə sürətləndirilməsi keyfiyyətin aşağı düşməsinə səbəb ola bilər.

Bəzən həm mütəxəssislər, həm də işin mahiyyətini bilməyən insanlar bu mövzuda fikir bildirirlər. Lakin məsələyə peşəkar yanaşdıqda aydın olur ki, müəyyən proseslər yalnız mövcud qaydada həyata keçirilə bilər və alternativi yoxdur. Bununla belə, vacibdir ki, müzakirələrdə operativlik prinsipinə üstünlük verilsin.

Təəssüf ki, ölkəmizdə tez-tez belə hallarla rastlaşırıq: iş başlanır, bir müddət sonra isə maliyyə problemi səbəbindən dayanır və ya ləng gedir. Halbuki geniş işçi qüvvəsi cəlb olunarsa, görülən işləri daha tez və keyfiyyətli şəkildə başa çatdırmaq mümkündür".

Çiçək Sadatova

Telegramda izləyin