Armaninin vəsiyyəti məlum oldu

Məşhur italyan dizayner Giorgio Armaninin vəsiyyətnaməsi üzə çıxıb.

Sonxeber.az xarici mediaya istinadən xəbər verir ki, moda nəhəngi Armaninin vəsiyyəti markasının gələcəyi ilə bağlı mühüm detalları üzə çıxarıb. Sənəddə qeyd olunur ki, dizaynerin varisləri onun ölümündən sonra 18 ay ərzində şirkətin 15 faiz payını satmalıdırlar. Növbəti illərdə isə bu rəqəmin mərhələli şəkildə 54,9 faizə qədər artırılması nəzərdə tutulur.

Reuters-in əldə etdiyi məlumata görə, satış prosesində öncəlik LVMH, L’Oreal və EssilorLuxottica kimi lüks sənaye nəhənglərinə veriləcək. Əgər satış baş tutmasa, şirkətin birjada ictimaiyyətə açılması (halka arz) seçimi gündəmə gətiriləcək.

Armani sənəddə həmçinin, markanın əməkdaşlıq etdiyi digər moda və lüks şirkətlərinin də potensial alıcı kimi nəzərdən keçirilməsini istədiyini vurğulayıb.

1970-ci illərdə ortağı Sergio Galeotti ilə birlikdə qurduğu markanın əsas payçısı olan Giorgio Armani, ömrünün sonuna qədər şirkətin həm yaradıcılıq, həm də idarəetmə sahəsindəki rəhbərliyini öz əlində saxlayıb. Övladı olmayan dizaynerin şirkəti 2024-cü ildə 2,3 milyard avro (təxminən 2,7 milyard dollar) gəlir əldə etsə də, sektor ümumiyyətlə durğunluq yaşadığı üçün mənfəətində azalma müşahidə olunub.

Telegramda izləyin