Təyyarədən gələn pis qoxu gənc stüardessanın beyin travması almasına səbəb oldu

İngiltərədə gənc stüardessa qadın uçuş zamanı zəhərli qazlara məruz qalaraq travmatik beyin zədəsi alıb və bu hadisə onun həyatını köklü şəkildə dəyişib.

Sonxeber.az türk mediasına istinadən xəbər verir ki, Chesson, Puerto Riko istiqamətindəki uçuşda əvvəlcə "çirkli corab" qoxusuna bənzəyən qəribə bir iy hiss edib. Qısa müddətdə isə tənəffüs çətinliyi, ürəkbulanma və qusma şikayətləri başlayıb. Təyyarə eniş etdikdən sonra Chesson və başqa bir heyət üzvü xəstəxanaya yerləşdirilib. Lakin əsas problemlər bundan sonra üzə çıxıb.

Aparılan nevroloji müayinələr nəticəsində ona daimi sinir sistemi zədəsi və travmatik beyin zədəsi diaqnozu qoyulub. Həkimlər, yaşadığı pozuntuların adətən idmançılarda rast gəlinən xroniki travmatik ensefalopatiya (CTE) ilə oxşar cəhətlər daşıdığını açıqlayıb.

Chesson o anları belə xatırlayır: "Ağzımda qəribə metal dadı var idi. Bədənim tər içində idi, başım qarışmışdı. Nə dediyimi bilmirdim. Hər şeyi sisli bir yuxu kimi xatırlayıram."

Onun həkimi Dr. Robert Kaniecki də bu tipli çoxsaylı hallarla qarşılaşdığını, son 20 ildə 12 pilot və 100-dən çox kabin işçisinin eyni simptomlarla müalicə aldığını bildirib.

Bənzər hadisələr son illərdə də davam edir. 2024-cü ildə Dubaydan qalxan British Airways təyyarəsi kabində yayılan kimyəvi qoxu səbəbindən məcburi eniş edib. Həm sərnişinlər, həm də heyət üzvləri ürəkbulanma, başgicəllənmə və nəfəs darlığından şikayətlənib. Şirkət bunu "kiçik texniki nasazlıq" kimi izah etsə də, mütəxəssislər problemin daha ciddi olduğunu bildirirlər.

Uzmanlara görə, təyyarələrin havalandırma sistemlərindən kabinə daxil olan hava bəzən mühərrik yağlarının sızması və kimyəvi qarışıqlarla çirklənə bilər. Bu qazlar xüsusən uzun müddət uçuşlarda heyət üzvlərində ciddi sağlamlıq fəsadlarına səbəb ola bilir.

Florence Chesson-un yaşadıqları isə yalnız fərdi bir faciə deyil, minlərlə aviasiya işçisinin üzləşə biləcəyi qlobal miqyaslı riskin göstəricisi hesab olunur.

Telegramda izləyin