Küçədə silahlı hücum: 3 polis öldü, 2-si ağır yaralandı

ABŞ-ın Pensilvaniya ştatının York County bölgəsində baş verən silahlı hücum nəticəsində üç polis zabiti həyatını itirib, iki nəfər isə ağır yaralanıb.

Sonxeber.az xarici mediaya istinadən xəbər verir ki, hadisə yerli vaxtla saat 14:00 radələrində polis əməkdaşlarının apardığı əməliyyat zamanı baş verib. Silahlı hücumdan sonra bölgədəki məktəblərə "təhlükəsiz ərazilərə sığınmaq" xəbərdarlığı edilsə də, qısa müddət sonra ictimaiyyət üçün aktiv təhlükə olmadığı bildirilib.

Pensilvaniya ştatının qubernatoru Coş Şapiro hadisə yerinə gələrək həlak olan polis əməkdaşlarının ailələri ilə görüşüb. O, açıqlamasında bu cür şiddət hadisələrinin qəbuledilməz olduğunu vurğulayıb və ölənlərin xatirəsinə ştatda bayraqların yarıya endirilməsi barədə göstəriş verib.

ABŞ Ədliyyə naziri Pam Bondi isə sosial şəbəkə platforması "X" üzərindən açıqlama yayaraq, FBI və ATF (Alkoqol, Tütün, Atıcı Silahlar və Partlayıcı Maddələr Bürosu) əməkdaşlarının yerli polis qüvvələrinə dəstək üçün hadisə yerinə göndərildiyini bildirib. O, polisə qarşı zorakılığı "qəbuledilməz" adlandıraraq, həlak olan polis əməkdaşları üçün dua çağırışı edib.

FBI direktoru Kaş Patel də paylaşımında təşkilatın hadisə yerində olduğunu bildirərək, "Dualarımız həlak olan polis əməkdaşları, onların ailələri və bütün York County üçündür", – deyə qeyd edib.

Hadisə ilə bağlı genişmiqyaslı istintaq başladılıb.

Telegramda izləyin