Yaşayış binasında yanğın – biri körpə olmaqla 3 nəfər həyatını itirdi

Bursanın Karacabey rayonunda yerləşən çoxmənzilli binanın 3-cü mərtəbəsində baş verən yanğında biri körpə olmaqla 3 nəfər həyatını itirib.

Sonxeber.az türk mediasına istinadən xəbər verir ki, hadisə gecə saat 23:00 radələrində Saadet məhəlləsi, Atılqan küçəsindəki "Emek" apartmanının 3-cü mərtəbəsində qeydə alınıb. Hələlik səbəbi bilinməyən yanğın qısa müddətdə böyüyərək bütün mənzili əhatə edib.

Hadisə şahidlərinin məlumatı əsasında əraziyə çoxlu sayda yanğınsöndürən, təcili tibbi yardım və polis əməkdaşları cəlb olunub. Alov digər mərtəbələrə də sıçrasa da, yanğınsöndürənlərin müdaxiləsi nəticəsində nəzarət altına alınıb.

İlkin araşdırma zamanı mənzildə yaşayan 81 yaşlı Berguzer Kaplan, 2 yaşlı Hasan Emir Efe Çorapçı və 88 yaşlı Müyesser Arın yanmış halda meyitləri aşkar olunub.

Yanğının hansı səbəbdən baş verdiyi ilə bağlı araşdırma aparılır.

Telegramda izləyin