Qalib ordunun qaziləri: "Bir generalımızın qisasını bir ordunu məhv etməklə aldıq"

27 Sentyabr - Azərbaycan xalqı üçün həm hüznün, həm də qürurun tarixi səhifəsidir. Bu gün Vətən uğrunda canından keçən şəhidlərimizin müqəddəs xatirəsi ehtiramla yad olunur, qazilərimizin qəhrəmanlığını bir daha xatırlayırıq. Onların hər biri müstəqillik və suverenliyin qorunması yolunda göstərilən igidliyin canlı nümunəsidir.

44 günlük Vətən müharibəsi təkcə hərbi əməliyyat deyildi, bu, xalqımızın illərlə çəkdiyi ağrı-acının sonu, ədalətin bərpası, yeni tarixi mərhələnin başlanğıcı idi. O günlərdə səngərdə vuruşan minlərlə igidimizin hər biri eyni amal uğrunda mübarizə apardı: Qarabağı azad etmək, Azərbaycan bayrağını doğma torpaqlarda dalğalandırmaq.

Oxu.Az olaraq biz də Anım Günündə həmin mübarizənin canlı şahidləri, Vətən müharibəsi iştirakçıları Turqay Məhərrəmli və Polad Rzayev ilə görüşdük. Onlar müharibənin gərgin anlarını, şəhid yoldaşlarının əziz xatirəsini və zəfərə aparan inamı bölüşdülər.

Turqay Məhərrəmli bildirdi ki, döyüşlər başlayanda çox iddialı idik:

"Dayanmaq kimi bir niyyətimiz yox idi. Nəticə də göz qabağındadır. Biz bir generalımızın - Polad Həşimovun qisasını onların ordusunu məhv etməklə aldıq".

Polad Rzayev isə o günləri belə xatırlayır:

"Bizim məqsədimiz bizim olan torpağı geri qaytarmaq idi. Biz həm haqlı tərəf idik, həm də düşməndən fərqli olaraq, mülki əhalini hədəf almırdıq, onların ordusu ilə döyüşürdük. Qalib ölkənin fərdi olduğu üçün qürur duyuram".

Qazilərimizin sözləri bir daha göstərir ki, 27 sentyabr təkcə kədər günü deyil, həm də xalqımızın birliyinin, əsgərlərimizin şücaətinin və tarixi Zəfərimizin ilkin addımlarıdır. Anım Günü hər birimizi həm şəhidlərin ruhuna borclu olmağa, həm də azad və suveren Azərbaycanın gələcəyi naminə daha əzmlə çalışmağa səsləyir.

Telegramda izləyin