Everest dağında güclü qar fırtınası – minə yaxın şəxs kamplarda köməksiz qaldı - VİDEO

Çinin Tibet Muxtar Bölgəsində yerləşən Everest dağının şərq yamacında baş verən şiddətli qar fırtınası nəticəsində təxminən 1000 nəfər dağ kamplarında köməksiz qalıb.

Sonxeber.az türk mediasına istinadən xəbər verir ki, hadisə yerinə göndərilən xilasedicilərin donmuş cəsədlərin arasından keçərək irəlilədiyi görüntülər sosial mediada geniş rezonans doğurub.

Çin mətbuatının məlumatına görə, yerli hakimiyyət orqanları minlərlə metr yüksəklikdə yerləşən kamplara gedən yolları bağlayan böyük qar kütlələrinin təmizlənməsi üçün əməliyyata başlayıblar. Bildirilib ki, bölgədə yüzlərlə kənd sakini və xilasedici qüvvələr səfərbər olunub.

Bəzi turistlərin xilas edildiyi qeyd olunub. Lakin "Blue Sky Rescue" adlı Çin xilasetmə komandasına, qarın çoxluğundan çadırların çökdüyü, bəzi dağçıların isə hipotermiya keçirdiyi barədə yardım siqnalları daxil olub.

Sosial mediada yayılan videolarda xilasedicilərin qarla örtülmüş dağda donmuş cəsədlərin yanından keçərək hərəkət etdiyi əks olunub.

Qeyd edək ki, Çində son günlər Matmo Tayfunu səbəbindən ölkənin cənub və cənub-qərb bölgələrində güclü yağışlar, sel və digər təbii fəlakətlər gözlənildiyindən fövqəladə vəziyyət elan edilib. Eyni zamanda, qonşu Nepalda leysan yağışlar, torpaq sürüşməsi və ildırım nəticəsində ölənlərin sayı 39-a çatıb.

Telegramda izləyin