Antalyada keçirilən "Ən uzun bığ" yarışması maraqla qarşılandı

Antalyanın Kaş rayonuna bağlı Kınık məhəlləsində bu il ikinci dəfə təşkil olunan "Yörük Şənliyi" böyük izdihamla keçirilib.

Sonxeber.az türk mediasına istinadən xəbər verir ki, səhərin erkən saatlarından başlayan hazırlıqlar gün boyu davam edib. Tədbirdə xalq oyunları, bölgəyə məxsus musiqilər, əl sənətləri sərgiləri və ənənəvi ləzzətlərin təqdimatı ziyarətçilərin böyük marağına səbəb olub.

Şənlik iştirakçıları həm əylənib, həm də Yörük mədəniyyətinin qədim irsini yaxından tanımaq imkanı əldə ediblər.

Bu ilki tədbirin ən maraqlı hissələrindən biri isə ilk dəfə keçirilən "Ən uzun Bığ Yarışması" olub. Yarışda 7 iştirakçı mübarizə aparıb. Münsiflər heyəti qalibləri bığın forması, sıxlığı və ənənəvi tərzinə görə qiymətləndirib. Yarışmanın qalibi Bahri Kebapçı olub. Səhnəyə alqışlar altında çıxan Kebapçı, illərdir böyük diqqətlə baxdığı bığları ilə tamaşaçılardan tam bəyənmə qazanıb.

Bahri Kebapçı yarışmadan sonra verdiyi açıqlamada deyib:

"Bu bığlara 20 ildir baxıram. Onlara özümə baxdığım kimi, bəlkə də daha çox qayğı göstərirəm. Kəsməməyə diqqət edirəm. Əgər mümkünsə, məni bu bığlarla birlikdə muzeyə qoyardılar," – deyə zarafatla bildirib.

Şənliyin başqa bir maraqlı hissəsi isə "Pomidor Yemə Yarışı" olub. İştirakçılar dərəcə qazanmaq üçün qarşılarındakı pomidoru ən sürətli şəkildə yeməyə çalışıblar. Tamaşaçıların coşqulu alqışları altında keçən yarış həm iştirakçılar, həm də izləyicilər üçün əyləncəli anlarla yadda qalıb.

Telegramda izləyin