Avtobus sürücülərinin işə qəbul prosesi hansı meyarlarla aparılır? - AYNA

Son günlər ictimai nəqliyyatda təhlükəsizlik məsələləri yenidən gündəmə gəlib. Sumqayıtda 123 nömrəli marşrut avtobusunu idarə edən sürücünün narkotik vasitə qəbul edərək sükan arxasında olması cəmiyyətdə ciddi narahatlıq yaradıb. Hadisə bir daha göstərdi ki, sərnişinlərin təhlükəsizliyinə birbaşa təsir edən amillərdən biri sürücülərin sağlamlıq vəziyyəti və peşə məsuliyyətidir. Bu kontekstdə sual yaranır: avtobus sürücülərinin işə qəbul prosesi hansı meyarlarla aparılır və onların narkoloji, tibbi və psixoloji vəziyyətinə nə dərəcədə nəzarət olunur?

Mövzu ilə bağlı Sonxeber.az-a Azərbaycan Yerüstü Nəqliyyat Agentliyinin (AYNA) mətbuat katibi Tural Orucov bildirib ki, avtobus sürücülərinin işə qəbulu daşıyıcılar tərəfindən həyata keçirilir:

"Müvafiq qanunvericiliyin tələbinə əsasən, hər bir sürücü üçün tibbi arayış tələb olunur və işə götürmə prosesi Əmək Məcəlləsi və digər normativ hüquqi aktların tələblərinə uyğun aparılmalıdır. Həmçinin, müntəzəm sərnişindaşıma fəaliyyəti ilə məşğul olan daşıyıcılar istifadə etdikləri bütün nəqliyyat vasitələrinin reysqabağı texniki yoxlamadan, sürücülərin isə reysqabağı tibbi müayinədən keçməsini təmin etməlidirlər".

Tural Orucov əlavə edib ki, daşıyıcılarla keçirilən görüşlərdə AYNA onlara müvafiq tövsiyə və tapşırıqlar verir.

Vüsalə İbrahimli

Telegramda izləyin