Nobel Sülh mükafatı alan Mariya Korina Maçado kimdir? - BİOQRAFİYA

"Yeddi müharibəni bitirdim" deyərək Nobel Sülh mükafatına layiq olduğunu dəfələrlə vurğulayan ABŞ prezidenti Donald Trampın arzusu puç oldu. 2025-ci il üçün Nobel Sülh mükafatı venesuelalı siyasətçi Mariya Korina Maçadoya verilib.

Lent.az-ın xarici mediaya istinadla xəbərinə görə, ABŞ prezidenti Donald Trampın mükafatı alması üçün dəfələrlə çağırışlar edilib və İsrailin baş naziri Benyamin Netanyahu təşəbbüsə rəhbərlik edib. İsrailin baş nazirinin mətbuat ofisi sosial mediada Trampın boynunda Nobel Sülh mükafatı medalını taxdığını göstərən süni intellektlə yaradılmış bir görüntü yayıb.

Bütün çağırışlara baxmayaraq, "Yeddi müharibəni bitirdim" sözləri ilə mükafata layiq olduğunu tez-tez vurğulayan Tramp gözlədiyini ala bilmədi. Venesuela Milli Assambleyasının keçmiş üzvü və müxalifət lideri Mariya Korina Maçado 2025-ci il Nobel Sülh mükafatını alıb.

Mariya Korina Maçado kimdir?

Mariya Korina Maçado siyasətçi, sənaye mühəndisi və müxalifət lideridir, 1967-ci il oktyabrın 7-də Venesuelanın paytaxtı Karakasda anadan olub. O, Andrés Bello Katolik Universitetində sənaye mühəndisliyi təhsili alıb və sonra IESA-da maliyyə üzrə magistr dərəcəsini bitirib.

Venesuelanın uzun müddətdir mövcud olan Çavismo rejiminə qarşı müxalifətçiliyi ilə tanınan Maçado ölkənin ən nüfuzlu müxalifətçilərindən biridir. O, 2011-ci ildən 2014-cü ilə qədər Venesuela Milli Assambleyasının üzvü kimi fəaliyyət göstərib. Daha sonra özünün "Vente Venesuela" adlı siyasi hərəkatını təsis edib və onun milli koordinatoru kimi fəaliyyət göstərib.

Maçado demokratik dəyərləri, şəffaf seçkiləri və insan haqlarını müdafiə edən qatı müxalifət mövqeyindən çıxış edir. O, Nikolas Maduronun administrasiyasının dəfələrlə təzyiqləri və məhdudiyyətləri ilə üzləşib və 2023-cü ildə keçirilən müxalifətin praymerizlərində böyük fərqlə qalib gəlməsinə baxmayaraq, 15 il müddətinə dövlət vəzifəsi tutmaq imtiyazından məhrum edilib. Nəticədə, o, 2024-cü il prezident seçkilərində iştirak edə bilməyib, əvəzində Korina Yorisi dəstəkləyib.

Mübarizələri beynəlxalq miqyasda rezonans doğuran Maçado Venesuelada azadlıq və demokratiya mübarizəsinin simvoluna çevrilib. 2024-cü ildə o, azadlıq düşüncəsinə görə Saxarov mükafatına və İnsan Haqları üzrə Vatslav Havel mükafatına layiq görülüb.

Bu gün Mariya Korina Maçado həm Venesuelada, həm də beynəlxalq aləmdə demokratiya, insan haqları və azadlıqlar uğrunda mübarizənin simvolik simalarından biri kimi tanınır.

Telegramda izləyin